Waxaa ila haboon inaanu arrimaha la xiriira doodaha iyo mucaaradada suugaaneed ee loo hayo abwaan Bacadle oo ka badan inta aanu soo sheegney inala habboon inaanu ku soo gabagabeyno jawaab gaaban uu Bacadle ka bixiyey maansooyinka ka soo horjeeda qaarkood gaar ahaan kuwii la xiriirey xarigii Samsam iyo dooddii abwaannada reer Soomaalilaan, marka haddi jawaabaha abwaannada iyo Abshir Bacadle dib u jalleecno ka hor iyo dib gabaygii hore ee Gob Cunsuri Ahoo ayaa meesha waxaa ka sii socday gabayo badan oo ay soo mariyeen abwaanno badan oo ka soo jeeda degaannada Soomaalilaan kuwaa oo ka dhiidhiyey gabayada Bacadle oo xiriirka la leh xarigii Samsam Axmed Ducaale, Abshir oo garwaaqsanaya gabayada qaarkood iyo carada abwaannada ayaa soo saarey jawaab suugaaneed oo uu garwaaqsanayo dareenka suuganeed ee abwaannadaa Soomaaliyeed, laakiin ku adkeesanaya fikirkiisii hore sida dabeecadda Abshir Bacadle lagu yaqaaney. Abwaanka ayaa waxaa u suuro gashay in uu akhriyo inta badan gabayadii abwaannada wuxuuna halkan uu jawaab ku siinayaa toddoba ka mid ah abwaannadaas, wuxuuna yiri:

Cigow gabay asluubeysan oon garanayaad sheegtay
Garna waad u leedahay inaad gocasho riintaaye
Mase garwaaqsan karo inuu tolkaa gabadha taageeray

Gabayga Maxamed Cali waxaa ka dilay ceebuhuu galaye
Sidii geed salweyn buu u dhisnaa oon la goyn karine
Gadowgiyo sargooyada innaba laguma gaareyne!

Maxamed Xirsi Guuleed tix aan garan ayuu sheegay
Gabay nuxur leh oo gaaban buu gacanta ii saaray
Guuleed gujada beeshu waa gabadha hiilkeeda!

Ina Dhagaafe gabaygiisu waa gar iyo taariikhe
Go’aan adagna wuu qaatay oo gobi ku naalooto
Wuu noo garsooraye cidnana kuma garaafeyne!

Axmed Naasir gabaygiisi waan garanayoo ruugnay
Gar adeegga iyo meel danboo gubad le mooyaane
Gabaygu laaxin male wixii gafana gabadha hiilkeed dhe!

Gabaygi Shiino Guba kama duwana garashadaydiiye
Garaafooyin iyo waxaa ku jiray waa la aar gudane
Halkuu gaaray iigama go’neyn waa dagaal geline

Gabaygi Maxamed Ow Yuusuf uu Baran ka soo giisay
Gocasho iyo hiil buu ahaa gun iyo baar taabtay
Gogol lagu garramayoo kallaa loo gunaanadaye.

Fiiro gaar ah
Ugu danbeentii waxaa amaanadu ku jirtaa ineynu baarayaasha soomaaliyeed ku biirinno in warbixinno badan oo arrimaha aanu ka soo hadalney la xiriirta inay ka sii tixraacaan qormooyinka isugu jira tix iyo tiraab fara badan oo ku soo aroorey boggagga Soomaaliyeed ee internedka, waxaase xusid mudan in dhammaan silsiladda Samsam ee taxanaha ah oo ay ka qayb qaateen abwaanno badan laga heli karo si rasmi ah webka: somalitalk.com/samsam.

Geeridii Bacadle Kaddib
Inkastoo qadarta Alle aanan cidi celin kareyn haddana geeridii ku timid Abshir Nuur Faarax Abshir Bacadle 10kii Oktoobar 2010kii, waxay gilgishey dadkii garanayey ee ka mid ahaa bulsho weynta Soomaaliyeed, qaar ka mid ah qolooyinkaana waxay tiiraanyada kaga aaddan geerida ku timid Abshir Bacadle ay ka cabireen tix iyo tiraabo kala duwan, fara badnida qoraalladaa iyo maansooyinkaa halakan kuma wada soo aroorin karno, laakiin waxaanu ka dooraney qaar ka mid ah maansooyinka iyo anaga oo tilmaami doonna qaar ka mid ah qoraaladdaa inkastoo aanu meeshatan ku soo tabin doonno sida ay ku yimaadeen.

ABSHIR BACADLE, ADDOON IIMAANKIISA KA RUNSHEEGAY OO KU DAYASHO MUDAN!
Qormo xusuus qor ah.

Qormadaan waxaa qorey qoraaga qiimaha iyo qadarinta mudan ee qalinkiisu furan yahay Ustaad Abuukar al-Badri, waxaanu ku talin laheyn in aad aqrisaan qormadaa aad iyo aadka u qiimo badan, waxaana laga daalacan karaa mareegta hoos ku xusan.

Gabaygan waxaa tiriyey abwaan Maxamuud Maxamed Aw-Yuusuf, abwaanku waxa uu halka kaga hadlayaa arrinta Samsam oo in badan qoraallo iyo gabayaba lagaga hadlay isaga oo ka duulaya gabayada ay is dhaafsadeen abwaan Abshir Bacadle iyo Cabdi Cige. Abwaanku waxa uu ka tiriyey tixdan la magac baxday Gacan Saar, isaga oo jooga magaalada Badhan taariikhdu markay ahayd 10ki Jannaayo 2005tii. Waatan tixdii:

Abshiraw tixdii gabay haddaan gabal ka soo qaato
Taariikhada guunka ah haddaan soo gadaal celiyo
Lixdankii go’aankii ahaa gaasir ma ahayne
Galbeed iyo bari koonfur waa loo guddoonsadaye
Gudi wadara Soomaalibaa xaajada guraye
Axdigii la galay waakan yaal goboladeenoo dhan
Intaasaan ku soo goynayaa teena guudnimo
Geli mayo sheekh Faysal iyo tiina gaarka ahe
Hadday gabadhu Boosaaso iyo Bari kasoo gooshtay
Ay guriga soo haybisoo gaari lagu keenay
Madaxweyne waa loo galaa waa ged caadiyahe
Guurihii maxaa loola baxay gabadhu waa care!
Iyadaan wax garanayn maxaa loo gol qabateeyey
Sidii gaalo heerana maxaa gacanta loo saaray
Gacan dumar nin yiri waa ka baqay gaabanaa hadalku
Waxba yaan god lagu dhuunto iyo geed la ii korine
Samsam waxa gefkeedii cuskaday Shiikha guunka ah
Golayaal wasiir iyo garsoor guurtidiyo xeerka
Gidigoodba waa loo dhamaa gabadha ceebta
Gafka dhacay Magaadliyo Xabuush waw gudboon yahaye!
Gadabiirsay iyo guruxi waa wada gacmeeyeene
Waa waxa gil gilay dawladdii gaararka lahayde
Waxa aad gasheen Ina-Cigow gobi mayeesheene
Garsoorkiinii sare waad ogtahay waxuu gabood muujay
Cisbataalka waa loo genbiyey xaashidi u gooyey
Mid kaloon wax loo geysan bay magac ka geeyeene
Garyaqaannadii waa og tahay xarig in loo gooyey
Loo diid gargaar iyo inay gacan ka siiyaane
Iyadoon cid garab taagan iyo gacal dareemaynin
Iyadoo garbaha qaawan bay gegedii taagnayde
Waatii guyaal lagu xukumay kiis la guudmaray
Geyigoo dhan waa laga og yahay guuldarrada meesha
Inaad gole timaadiyo inaad gabaydo maahayne
Geeraarku maahayn in aad geed is marisaaye
Waxaad gocotay iyadoo garaan kaa qancinayaa
Waxaad tiri gohaad baan arkay iyo geeri lay baday
Waxaad tiri gantaalo iyo hubaa igu garaacdeene
Gudihii Hargeysa iyo Berbera waad go’ daad tidhiye
Godobtaad ka sheekaysay iyo reerka waxa gaaray
Ma gudboon yihiin gabadha iyo nabarka loo geystey
Aar goosigaagani halkuu galay madoonayne
Alaylahe geyaan waa disheen beel is guursigii
Marse haddaad wadaadkii gabyiyo gubaba soo qaaday
Alaylehe colaad guuna ah baad saartay gaadada
Maxaa loo gilgilay maatadiyo gabar aan qaangaarin
Gar Ilaahigey inanta waa loo gabood falaye
Goobyaalay baa kula gudboon waanad garanayne
Hadaadse goosateen godob la’aan maad iskaga guurtid!

Gabaygan waxaa tiriyey Maxamed Xirsi Guuleed 2005tii Jannaayo 13ki isaga oo kaga jawaabaya tixdii Abshir Bacadle ka tiriyey qaddiyadda Samsam Axmed Ducaale. Maxamed Xirsi wuxuu la qabaa Abshir Bacadle damqashada uu ka damqaday dhibaatada haysata gabadha Soomaaliyeed, laakiin wuxuu saluugay sida uu abwaanku u weeraray ummad dhan oo aan dambi qaybsan karin. Wuxu yidhi:

Abshiroow gabyaa caan ahoo garashalow heedhe
Anoo gabana iyo maalintaan guuxa baranaayey
Iyo maanta oon gabay badsaday, kala gorfayntiisa
Gadh wadeen ayaad ii ahayd geesi aan dhimane
Goleyaal ayaan kaa xusiyo goobo aan ogaye
Guuleed Fansalakh maalintaad gumuc ku tuuraysay
Kuwii kuu garaacaan ahaa sacab garowsiine
Gabdheheenna diinta leh tixdaad ugu gargaaraysay
Eed farax ku gelinaysay baan weli gardaadshaaye
Geeraaro qiima leh intaad gelisay raadyowga
Gol daloolo hore kaama maqal gef iyo deelqaafe
Haddase gabaygan kaa yimid dareen giiga igu beerye
Inuu yahay gef kaa yara dhiciyo gees mar Bani Aadan
Iyo Gedihii aan kugu aqiin inaad ka soo guurtay
Adigaa gadaal kala caddayn gacallahaygoowe
Gabadhaa Samsama xaajadaa gees kasta u faaftay
Gudaa jeelka ee lagu xidhiyo godobta sii raacday
Gosheedaa la taabtiyo dhibkaa gaadhay sharafkeeda
Inaad gabayga ugu hiilisaa waa gar Bacadloowe!
Hayeeshee gadaafada inaad gobol dhan eedayso
Oo inay gar eexeed naqeen guud ka wada saarto
Ood gaalo raacyiyo guniyo guush ku wada sheegto
Kulamay gudboonayn walaal garashadaydiiye!
Haddaad guluf abaabuli lahayd gabadha soo saara
Gurmashada Magaadliyo Xabuush, gala ma weydeen
Inta cadho la gawracan dhibkaa inanta loo geystey
Ee garab ku siinlayd ayaa geeshashoo badane
Maad gooni Fooxliyo Basaas, go’e u faallaysid?
Oo nimanka waad garanaysaa, gaar wax uga sheegtid?

Gabi ahaanba gabaygaan waxaa uu qayb ka yahay gabayadii abwaanada isu dhaafsanayeen arrinta ku saabsan Samsam, waxaana maansadan curiyey abwaan Daahir Cabdulle Maxamuud Daylaaf oo jooga dalka Swiiden, wuxuuna abwaanka yiri:

Abshir gabanta guubaabaduu ugu garbeeynaayey
Gaddii fidisay oo rag badan gacantogaaleeye
Kuwo aan giriifana arkoo weer xun soo gamaye
Ninkastana garaadkiisa hadal garasho yeelkeede
Geeraarna waa lagu nastaa lagu gareeystaaye
Taariikhda guun ka ah ayaa laga gunteeystaaye
Mar hadduuse xaafado galfado amase xeer gooyo
In lagaba gabsiistaa habboon laga gedoodaaye
Anna waa geddeeydii inaan dood ka qaybgalaye
Afkoodii intuu guran yohoow gees isugu bayra;
Ragga gabayga godob weyn ka galay gabadhu waa gaare;
Ee gorofta ceebeed sitee meel kastaba gaarey
Ee gudoonka Soomaalilaan wada garaafeeyey
Iyo kii inuu goosto raba gacalna dooneeynin
Gebigiin shirkad wada noqdoo gees isugu bayra
Rag hadduu dagal kama gudbee jeer iswada gaado;
Oo guluf colaadeed fardaha leysku wada giijo
Ee gumuc rasaaseed barqada leysla wada goobto
Si kastoo qolo loo gabadey geeridood badato
Waxay guushu raacdaa ciddii la gardarreeystaaye
Kuwa samaha laga guuriyoow gees isugu bayra
Gablan talo adduunyaay waxaad gebi dhacleeysaaba;
Waxaad gole xun Soomaalidii gabal ka tuurtaaba
Oo goosan keedii batoo qaar la sii gadaba
Mar haddaay birma geeydadii daniba kuu geeysey
Oo inaad agoon goowracdaa kula gudboonaatey
Adigiyo intii godob qabtaa gees isugu bayra!
Goorka hore sideedaba ibtilo waa ay gama’daaye;
Maruun buu habaar qabe gujaa oy galgalataaye
Kolkaasbeey gaaliyo Islaam gebagebeeysaaye
Maantana ragbaa eed ka galay oy ka aar gudane
Intii godob agooneed qabtaay gees isugu bayra!
Wax la yiri gaannari dhergood gowska dhuxul mooddo
Oo gacan ku dhiigle ah haddaa illee waad garane
Oo guunka ugu weeyn fitnada taagan garabkiisa
Ayaa ugu garfiicnaa yartaa guurtigii xiraye
Goobtaa intii joogtayeey gees isugu bayra!
Waxan uga golleeyahay haddaan soo gunaanadaba;
Sheekada gunteedii ayaan kuu gadaal dhigaye
Intuu inanta gafanuhu ku cuni jeelka gudihiisa
Ameey gocosho awgeed ilmada gobo ka siineeyso
Kii dhibkaa u geeystana aduun cidi ganaaxeeynin
Ee isgodo kolkuu soconayee garabka laalaadsho
Danbeey maanso guba iyo u noqon cigalle googaaye
Intii godob agooneed qabtaay gees isugu bayra!

Inkastoo Kaarshe ka soo jeedo degaannada Soomaalilaan haddana isagoo ka xun gabaygii hore oo Yaasiin Ismaaciil jawaab uga dhigey Bacadle ayuu waxaa uu mariyey afareeydaan soo socota:

Abwaannimadi aasaasiga ahayd; Eedday sharaftii dheh.
Asaraarka waxa uugu wacan; Aarsigaa daran dheh.
Waa in eedda layska dhaafaa; Adeer oohintiyo cayda.
Irkashadu haddii kale luntoo; Odaxi taabkeentay.

Intaa kuma ekaanin abwaan Kaarshe ee markii ay u timi dhaliil ayuu wuxuu tiriyey geeraarkaan:

Gacan qabashadiiyo
Qaskii iyo xumaantii
Qool beynu galinee
Intaan qaatey anniguye
Adna qeybta kala raro
Qabri baan ku tuurnee (qabiilkii)
Qof waliba wuxuu
Qaban yaqaanaa
Loo soo qadimayaa.

Waa gabay uu mariyey qof magaciisa ku sheegey Idbac, 5tii Nofember 2006dii. Gabi ahaanba gabaygaan gaaban waxaa uu lid ku yahay Abshir Bacadle oo ka careysiiyey dad badan oo dega Soomaalilaan, abwaanka maansadan curiyey ayaa ka mid ah dadka Bacadle ka caraysiiyey.

Dowladnimada maantay dhacdee daqaydu naafowday
Dooxatadu markay soo gashee dumarka laynaysay
Dab inaad ridaysaan maqloo dirirtay waagiiye
Mooryaan inaad dabagashaan daabaceed helaye
Shaydaan nimuu duufsadoo daacay baad tahay
Darsin dhigo islaannimadi baad darafka joogtaaye
Nin ku dilay markuu diyo baxshaa la iska daayaaye
Isagoo dabaabaadki iyo danabki heegeeysan
Hadduu duubcad kuu soo xirtaa digasho weeyaane
Duulaanka Xamar waa qabiil loo durbaan tumaye
Adiguna danaanaad u tiri nimanku waa doole
Ama doollar tobanhaad cuntood u digrinaysaaye!

Abshir Bacadle
Bacadle 3dii bishii Nofember 2006dii, isaga oo ka sheekeeyey sababta ku bixisey gabayga soo socda waxa uu yiri, “Waxaan aad uga xumahay in mucaaridkii maamulka la baxay Soomaalilaan ay u hadlaan sida maamulka Riyaale oo kale, iyo sidoo kale in culumaa’udiinka Soomaalilaan ee bayaanka soo saaray dhowaantan ay markii la su’aalay dastuurka Soomaalilaan ma waafaqsan tihiin ay dheheen waan waafaqsannahay, sababtoo ah isaga ayaaba dhigaya in shareecada Islaamka wax lagu xugmiyo, su’aasheyduna waxay tahay maamulka Soomaalilaan ma shareecada Islaamka ayuu ku dhaqmaa oo uu hadda ugu xiran yahay Sheekh Maxamed Ismaaciil?” ayuu yiri Abwaan Bacadle oo mar kale su’aalay culumaa’udiinka Soomaalilaan, “Maamulka Riyaale weligiis ma fuliyay hal xugun oo qisaas ah ama rajmi ah, illeyn aayadihii lama nasakhine, mise waa la jiifiyaana banaan, la joojiyaana banaan oo dowladdu waxay sameysaba waa sharciga Islaamka”.

Hargeysaay habaar baad qabtaa waana la hubaaye
Hoodiyo nasiibkaagu waa holacya baaruude
Helina meysid towfiiq intaad Diinta hororeysid
Waa hiil madow iyo hulaaq hoos ka maaruqaye
Halkii diinta lagu caayo waa laga hijroodaaye
Biyana lagama helo tacabna waa laga habaaraaye
Hoggaan Diinta neceb culumadana laga horeynaayo
Hawaayadiisuney tahay kufriga inuu u haanyoodo
Oo Diintana hagrada Diimuqraadigana u heelan
Hootada Carsaa’iil ha sugo hoos madoobuhuye
Kuwii howshan baray meesha waa kaga horeeyaane
Hargeysaay nasiibkaagu waa holacya baaruude;
Hunduuga iyo Singuhu ammaanbey ku helayaane
Ninkii hiil Ilaahey ah baa lagu hujuumaaye
Habkii Guwantanamoo kalaa hibo laguu siiyay
Helina meysid biyaad ka harqatiyo hogol daruureede
Hoggii culumadaad noqotay iyo god iyo haadaane
Hidda raaca nimankii Bilaal hoojiyaad tahaye
Hargeysaay haddaad culumadii weli ku heysaaye
Adoo gaal u hiilinahayaad dhiig ka halac siisay
In Kitaabku na hoggaamiyaad ka hortageysaaye
Habaar qabuhu daaquudki buu kugu horeeyaaye
Inta culumo la huruufayo oo lagu hajuumaayo
Wallee ineydnan nabad heysan weyku hambalyeysiine
Halkaa Sheekha uun-bey nafluhu idinku heystaane
Boqollaalo ka horeeyey baad godad ku heysiine
Oo dhiiggoodi ay ka harqadeen howlwadeenaduye
Oo heyre Buush iyo Melez ku hanbalyeeyeene
Oo aad hilibka culumada dhaqaal uga heleyseene
Wallee halis waxaad ugu jidhaan hoogi reer Saba’e;
Harqinta dhiigga culumada rag badan bow hamuun qabaye
Halkii ay mareen baad dhowaan hor u tegeysiine
Sidiinaa ayagoo u hadlayaa hoos Alle u dhigaye
Immisaa haalig dunidaan ka tegay hoos madoobe ah
Culumadii Hargeysoo go’aan hagarle soo saaray
Oo Bii.Bii.Sii ka hadlayoo dowladda u hiishay
Dastuur Diinta hoojinahayey u hambalyeeyeene
Kitaabkey nagu hagaan bey dheheen howlwadeenaduye
Caamadii halaajiye raggii ka hadlay Reediyooga
Hadalkii Sheekhu dowluhu rag buu geliyay haadaane
Dastuur Diin hoggaaminahayey u hambalyeeyeene
Oo hilibka Sheekh Maxamed bey ka hadli waayeene
Oo woow hoggaansameen ra’yigi howlwadeenada’e
Hargeysaay haddaadan iska qaban tobanka hiiroole;
Dul cad iyo Hartii Sheekh mar kale waad u haajiriye
Kuwani heysan maayaan kursiga waana la hubaaye
Culumada Hargeysaay maxaa xaqii idiin diiday?

Gabaygaan waxaa tiriyey abwaan Maxamuud Axmed Colaad Filig, wuxuuna ka mid yahay gabayada af-celinta ah ee ku socdaa Abshir Nuur Faarax Abshir Bacadle, gabaygana wuxuu ku bilowdey sidatan:

Abshirow daliil gabay haddan deelka ka hinkaadsho;
Deelqaafki aad tiri haddaan dood yar ka iraahdo
Anigoon dambaabaynin baan kuu dulmarayaaye
Marreexaanku dooxadajubbu dagin u yaalaaye
Duulkaad ka sheekaysay bay daris wadaagaane
Deerkaa u kala rogan Absame taniyo Dowlowe
Doqon-diide iyo Cowramale Dir iyo Shiikhaasha
Mushunguliga deexdiyo Hartida duq iyo waayeelba
Dugaag mahan oo ehelnimaan kala dugaalnaaye
Diiraro anoo joogo iyo daawo iyo gowlin;
Digaal iyo anoo dowmacaan dalab ku maalaayo
Dooyaan ku tagi meelkastoo la iga doonaaye
Daaroodku waa wada dagaa doolo iyo howde
Danihiisa uma sheegi jirin dayday iyo tuuge
Waxaad adigu ugu duubatiyo Daahir garan waayay!
Dowladnimada maantay dhacdee daqaydu naafowday
Dooxatadu markay soo gashee dumarka laynaysay
Dab inaad ridaysaan maqloo dirirtay waagiiye
Mooryaan inaad dabagashaan daabaceed helaye
Shaydaan nimuu duufsadoo daacay baad tahay
Darsin dhigo islaanimadi baad darafka joogtaaye
Nin ku dilay markuu diyo baxshaa la iska daayaaye
Isagoo dabaabaadki iyo danabki heegeeysan
Hadduu duubcad kuu soo xirtaa digasho weeyaane;
Duulaanka Xamar waa qabiil loo durbaan tumaye
Adiguna danaanaad u tiri nimanku waa doole
Ama doollar tobanhaad cuntood u digrinaysaaye
Daroogada cagaarani aday daawa kuu tahaye
Adaa deeq Ilaahay u qabay dahab islaameede
Guryahoodii kuwaad diirateen dabato weeyaane
Hiiraale niman doortay buu daaci u ahaaye
Isagoo dadkiisii watuu duulan soo kicine
Damiciinu wuu guri haddaan moodku daqarayne
Dayniile iyo Dari wanaag looma daadihine
Dakadoodi waa laga xiroo looma soo dagee
Digniin bay baxsheen oo hadday dirir u joogaane;
Haddii aad Daraawiish tihiin diinta u adeego
Oo aan dakanadii horiyo xumo la daacaynin
Cirfe maxaa dikee loogu yiri wabiga daaftiisa!
Dhuxulow dariiquu xirtiyo Yuusuf dabinkiisi!
Maxaa loo dulmaray waan ogeeyn dacatigoodiye
Dambigay galeen ma adinkaa daahir uga yeelay
Shariifkuba dadaal iyo wanaag buu dalbanayaaye
Danihiisa inuu khayr u huray baan daninayaaye
Waxse dilay rag diriqsanahayiyo ducuful iimaane;
Haddii diinta Eebbahay sharciga lagu dabaalaayo
Oo daalimiintii dhulkaan laga dul qaadaayo
Maandhow maxaan diidayaa daraja weeyaane
Daaraha Shabeeliyo intaad dagalka meereeyso
Dukaannada Ismaaciil inataad laba diblaynayso
Dalaggii agoontiyo intaad daaqa guraynayso
Tunni duunyadeedii intaad darar ka maalayso
Diriciyo cimaamaduhu waa dac iyo ciideede
Ka dabaasha adinkaa xumaan diin u qaayibaye!

Gabayga soo socda waxaa mariyey abwaan Cumar Maxamuud Maxamed oo ku magac dheer Baarqab kana mid ah abwaanada Soomaaliyeed ee qurbaha ku nool. Cumar wuxuu doonayaa in uu halkaan ku soo bandhigo gabay jawaab u ah gabaygii abwaan Abshir Nuur Faarax Bacadle, gabaygaas oo magaciisu ahaa Beel Yahay Gadoodayoo Go’daydoo Gabar ku Ciil Beeshay, abwaanka oo ujeeddadiisa iyo dareenkiisa suugaaneed ka hadlaya waxa uu yiri:

Abshiroow gabaygu mar buu kula tagaa godobna reebaaye
Nin walibana garaadkiisuu hadlaa garasho waa meele
Gefefkuna mar bey kaa dhacaan adoon u guuxeyne
Marka hore dib uga guro xumahaad galisay taariikhda
Maanso waan u guuxaa in badan waan gareysnahaye
Hayeeshee gabyaa sare waataad aheyd gu’ iyo jiilaalee
Faysal ku gaar yeel xumaha intii geysatuu qabane
Reerahana ha kala geyn sharaf baa loo guntaa xarige;
Gobtu ways taqaan ragoow gees walbood eegto;
Nimuu walaalkii ganahayoo gees u riixaayoo
Ama uu garbaduub intuu u xiray geeyay meel geesa
Ogoow mar buu gacalka dhaamaa gaalka aad sheegtay
Gundhiga iyo ujeeddada haddaan qalinka gaarsiiyo
Gartu Allee taqaannaa goor kastooy tahaye
Gilgishaye aan ku faro xaal inaad geeyso
Gob iyo gaan geetahoon isqaban wuu i gali waayay
Ninkii gafa lama daba galoo looma guumeeyoo
Guushuu kaa heelaa markaad gumuc ku tuurtaaye
Sidii godka loogu rido amase loo gaado
Maskaxdaa go’aan laga dayaa gama’a how diidin
Intaa waan gorfeeyaye mid kale iga gudoon maanta
Guri wixii soo dumiyo dhibkii Soomaali kala gaaray
Abshiroow gu’ iyo deyr wixii lays gumaadaayay
Gandhari wuxuu hooya dilay Isaaq wuu ka gaar yahaye
Sharaf buu gobal iyo dhuulkii goostay kaligiiye
Innagaa is gooynaye raggaa yaan la gaaxine
Godobteena aan dhaqnoo tolkeen yaa la sii gubine
Geesi wuu garqaataa kolkii dagaal lagaga guuleysto
Adiguna gaddii lagugu yiqiin waad gadaal dhaaftay
Gumaadkiyo xasuuqii miyaad garasho beel gaadhay!
Reer waqooyi haddii lala garamo ama garaab yaalo
Inagaa gumeeynoo colaad geesta kala raacnay
Nin walboo gorfeeyana gardarraa geesta naga taala
Waagii baryaba raggii taangi lagu garaacaayay
Koofur oo gurmada dadkaan geynay xeradooda
Inaan wali u sii goodinaa waan ka gaabsadaye
Lixdankii ummad gees aheyd gacal ku soo maagay
Oo gogoshaadii kuu yimid calanna kuu geeyay
Oo aan abaal kood la gudin lana garafeeyay
Inaan wali u sii goodinaa waan ka gaabsadaye;
Faysal god iyo qool hadduu mool is galinaayo
Garaabada iyo ninkii la qaba madax garaaciisa
Isagaa goor danbaba ku dhici hadaamuhuu maanta goobaaayo
Beeshase in loo gudbaa waan ka gaabsadaye
Goos goosan meynee khabiir soo gubtaad tahaye
Aniguna haddaan soo galoo waan gardaadsadaye
Dib u goco Abshiroow wey gudboon tahaye!

Gabayga soo socda waxaa mariyey abwaanka yar ee lagu magacaabo Axmed Aaden oo ku nool Kalgari, Kanada, wuxuuna tiriyey 26dii Febraayo, 2005tii. Abwaanka waxaa ku dhaliyey inuu curiyo tixdan jawaab gabayga ah markii ay soo gaartey gabay uu tiriyey Abshir Bacadle oo uu u arkey in Abshir beesha abwaanka meel uga dhacay, taana waxay noqotey mid u cuntami waydey abwaanka, sidaa darteed waxaa uu mariyey gabaygaan oo jawaab u ah maansooyin isugu jira gabay, geeraan iyo shirib uu Abshir Bacadle u soo mariyey beelaha Isaaq.

Ma gabyo ma geeraaro mana guuraabo
Hayeeshee goor dhawayd bay igashay tixdaan gabay tuducsiine
Gudgude roob sidii maw gabogabeeyaa
Ma gan ganaa hageeyeen geestaa ogdheeriyo gobol Hargaysaade
Gunburaha bankiyo sudiyo gaaroodi
Gabiilay korkeediyo intaa gubano daaqaysa
Guudkaa sanaagiyo garadag Cayniyo godonka Ceel-Afweyne
Qolyaha geerisa afkeeda yaaliyo beeshaa saraar godan iidoogsan
Inta gu’gii hawd u baxdee galool xagar leh dheehanaysa
Gadhkayogolka sayliyo aroor surimada geeri
Golis geedka ka bixiyo gobabkaa hadhweyn herer gudaheeda
Haradaa garduuriyo inta gal saxar geela ku horjoogta
Ee guba laga tirshee laga gayoonwaayey
Saw geesinnimo aan ku dheerihiyo garashaday maaha
Afartaa gigsiiyaye maan kaga gariirshaa
Afar kalena way in guntaniyo gelin kaloon dhawri
Gabayaagu geestayaduu ahaa geeraarshawguye
Godkii Ina Jadeeriyo Aflaw maan gabay ku guuraabo
Guba tuu Salaan ka tirshayiyo geeraarkii Faarax Nuur
Geedka maan ugu golo goleeyo gabaygan
Cumar Usteraaliye geelow marshiyo milgihii gabyaaye
Gaalodiid Cali Jaamac miduu ku gowracay tuuggii reer Xamare
Galkuu ka daray Qaasin gabay gulufkii Yawliyo gawdii Dhirbaaxe
Ka gariirshe Timacadde guuxii Qawdhaniyo guhaadii Dalaayad

Garnaqsigii Ina Gahayriyo kolay ku tahay deelayduu gunaanaday Iidaane
Gabay mujaahidlaha Hadraawiyo Gaariyiyo
Inta gobaad u kacay gabannada soo yeedhi!
Giddigeed Soomaaliweyn gurigaygaa laga marshaa gabay ahaantiiye
Intaas oo gabyaa caana baa gocosho ii diideye
Kolkan maan u quus gooyo gadhyarahan Xamar ka geeraaray
Gabaygaagu Abshiroow waa yootan geeljire e
Gaf inaad naga gashay ood nagu geeraari
Oon garawshiiyo loo ogayn xaajo laysugu garaabo
Gardarro adaa noogu yimi gaf aanoo gayigiina noo ool
Gun inaad ku tidhi guurtida reer Sheekh
Oo gob baad tihiin na odhan haddana yara gumaysan
Gobannimiyo gunnimo miyaad guri isugu gayn
Sidee garaadku kaa yahay maandhoow garashadaada
Waa maxay gunbaad tihiiniyo haddana gobaad tihiintan!
Geesaha iskula jirtee is garabgoryeynaysa
Sidii goosan adhi oo guduudane gilgilay armuu
Arrinkaaga gunta dheeri kaa noqdaa garashooy yeelkeed dheh!
Hartigaad gargaarka u fidin isagay u taal hadduu kuugu garaabaayo
Geelahase Jabuuti iyo waxaanad gacaylkay u soo qaadin
Waa laba guroo is xiga oo gumaysi kala gooyey
Haddaan goostay goobtaan fadhiyo saw ma gobonnimo dhashan!
Miyaad gacan ka gaysatay adaaban gobonnimo kuu horseed ganaye
Inaad gaalo nagu sheegtaan gama’a ii diidye
Hayeeshee ciduu Eebbaheen gacansiiyey ee gobonnimo kusoo ceshay
Gayigan midhaa saw ma aha gaarka isu taagay
Calan Tawxiid loo guntiyey inaan guddoonsanno
Gartu saw garashadayo maaha iyo gargaarka Raxmaan
Idina calan geeso leh ayaad sidii Iblays sujuud isugu gaysaane
Garta Ina Sanweynaa loo geysan jiraye gaalnimo keeneebaa u dhaw
Garanwaagu kaa uu soo marshay garashooy yeelkeed dheh!
Diinta aakhirsaman soo gashay ee gaalku ka danbeeyo
Ee Muslinkii lagu lugooyeyba garanayo maanta
Inay gaabis soo noqon siduu Rasuulku noo sheegay
Ooy toddobaatan guudkawga bixi gaalnimo agteeda
God qudhaa ka saxa waxa boholo soo gudban
Galay ana kaasaan garanaynaa weeye
Gabyaa afhayeen inaad geeskaa ka tabay garta isugu gooysay
Geeridii Cigaal hadduu Tigraygu tacsiyo geeyo
Waa garasho aan ku dheerahayiyo talo gobsanaantayda
Adna in gudin iyo warmaha godan laguugu soo afeeysto
Waa garaad yaraantaa iyo talo guracnaantaada
Gole Amxaar gaal madaw iyo kumaa doofaareey gogal loo dhigay
Guutooyinkaa Tigraha kuwaa Goday ka soo jiidaaya
Gilinsoor kuwii ku korayiyo go’e saw gurigiina maaha
Goor iyo ayaan gaaljecelnimadu saw taa gama idiin diiday
Galawgaa ka ciyey garashooy yeelkeed dheh!
Gadh u ciil qabaa jira guba iyo wixii gabay la geeraarshay
Waatuse guddoonsaday Salaan guushuu lahaa gabay ahaantiiye
Adna waxa ku gubayaan ogahay gabay yaraantaada
Waxba hay guudmar laynine keen gundhigaaga oo
Gabadha yarta ah gacalow soo dhaaf gocashadeeda
Gadhkaan quus aqoonse gadhquus inuu noqdo gari saw maaha!
Ku galgalo Hadraawaad istiri Gaariye iyo Qaasin
Ganay colkiisiyo waxaad gabay ka doontay gabanada jooga
Ha ka yaabin gabyaa hore nin ahi inuu gabay jawaabtii kuu marsho
Gadaal uga baydha duqa hay guufanaysnaadee
Oo gelinba nin yari haygu gabay bartee daaya
Golis Kolej kaalayoo ku baro gabay gayaankiisa
Ama Gaariye Camuud ugu tag golaha suugaanta
Hadduu gabyaa hore nin ahi jawaab diiday gabaygaaga
Gedgaa miyaanu cunsuri ku noqon garaadlaawennimadaada
Ku ganbiyay kolkee garashooy yeelkeed dheh!
Ceelashaan gudhaynini saw qubays koluun kuuma gaadhaan
Maxaad garbaha hoostooda u qoysaan isu qadhmuun goynta
Gartu saw maaha guud ahaan jidhkuba in la uskag gooyo
Guryahii Xamar dhaadheeraa ka goostaye ka dhigo god Mad-har
Gasiinkii beeraha ka baxi wabiyada sawtaad gaanjoda ku beertay
Degmadaa Gabiilay baa iigu filan garaw gasiinkiisa
Gasiiradaha Carbeed waad ogtahay midho guudkooda ka bixin
Haddana waad garan waxa midho gadaankooda sudhan
Gini baan ku gadan geedihii cambaha lahaa gabi ahaantoodba
Afarteeda gees dunida ganacsi baan gooshaa
Nin ragi wuxuu galiyo hay yeedhin tuu gudo
Nin abaal gala inaan ahay daayin kaw marag gala
Meel la iigu gudayse mahayo gabi ahaantiinba
Wixii Soomaali gobannimo lahayd guudka yaw tidcay
Gogosheedu saw tan golayaashayda taal garmoognaantaada
Gu’ wayn inaad jirtoo gadhku ku ciraystay
Ood nolosha galinkeedii danbe galbis ku tahay
Garaad kaaguse gaabisiyo gocosho mooyee
Miyaan geeda kale ka gu’in magane guudkaaga!
Tixday gabay waxaan ku soo gooyn
Gobta Reer Sheekh Isaxaaqiyo guud ahaan gobi dunida meelay joogto
Wixii kula garaado ah ayaa loo marshaa gabaye
Mooryaan gadhle maxaan uga gabyaa saw la garan maayo!
Waxaanse odhan gocashadeed dhaaf waryaa garashadeed yeelo
Oo ninka Xamar ka soo geeraarayaw garashooy yeelkeed dheh!

Ugu danbeyntii abwaan Axmed Aadan wuxuu ku soo gabagabeeyey dooddiisii suugaaneed hal tuduc oo Alle tuug ah sida ay tahayba:

Allahayoow noo danbi dhaaf adaa sadriga daalacdee.