Gobannimo – Cabdillaahi Cawad Cige

Tixdan gaaban oo magaceeda la yidhaahdo Gobannimo soona baxday 8dii Jannaayo 2005tii, waxa ay ka jawaabaysaa gabayga Abshir Nuur Faarax Bacadle uu ka tiriyay gabadha Hargeysa ku xidhan oo magaceeda la yiraahdo Samsam. Gabaygana waxaa tiriyey Cabdillaahi Cawed Cige, oo ku nool magaalada Lifarbuul ee Ingiriiska sida sheegney.

Gaafimeeray maalmahan sidii, goosad lay yidhi,
Nin uun baa gartaydana ogoo, dedaya uun goore!
Abshirow guyaalladan ma tirin, gabay xidhiidhkiiye,
Geeraar ma soo curin intaan, gudiyay qaafkiiye,
Godka lagu negeeyiyo ka tegay, gobolladiisiiye
Galladdiisa niman baa badshaan, sii guraay idhiye
Waxse maanta igu soo gingimay, maanso gelisteeda
Gujadaada weeyee bal aan, galalka baadhbaadho!
Garta inanta lagu foororshiyo, Kiiskan go’i waayay
Sheekada galbeed iyo Nugaal, gees kastaba dhaaftay
Gasac iyo xumaha lays marshiyo, hadalka geesaasan
Gurrac iyo inuu khalad ku jiro, kuu garawsaniye
Hayeeshee Guhaaddiyo halkaad, gelisay baaruudda
Magaadliyo godkaad taabataan, gocanayaa mooyi
Tolka aad go’aan wada sudhaan, gocanayaa mooyi!
Godobtaad Isaaq taarataan, gocanayaa mooyi!
Lixdankaad ku goobyaashay baan, goconayaa mooyi!
Garyaqaanno loo soo xuloo, geydhka wada taagan
Guddiyada xuquuqdoon mar qudha, goynin hadalhaynta
Gadhcas iyo aqoonyahan shiriyo, ururro guuxaaya
Miyaanaan gob lama caasiyee, gabadha taageerin?
Miyaanaan go’aammiyo ka qorin, xeerar wada geydhan?
Miyaanaan xilkii nala gudboon, garannin dawgiisa?
Gar Ilaah taqaan baa Islaam, gole ka naadshaaye
Garaad diin leh baan kuu maqliyo, Caalin gaammuraye
Misna taadu good iyo ka daran, Cuba ku nooleeye
Iyadoo geyiga aan fadhiyo, culimo guurayso
Oo ay diintu gaashaan u tahay, gebi astaantayda
Gacalkaaga anigoo ah iyo, garabka xooggiisa
Maxaad gaalo ii daba-dhigtiyo, Xabashi gaankeeda?
Gabaygii wadaadkii miyaan, lagaba guuraynba?
Gefka aniga lay bado miyaan, qalin geyaa joogin?
Gobollada isdiidiyo anoon, gelin ammuur sheexan
Dhulkaad tayda geysiyo anoon, gacantogaalaynin
Badahaas guntoodiyo anoon, gaadhin dhagartaada
Taariikhda guunka ah anoon, dib ugu guuraynin
Gelin hore wixii dhacay bal aan, guudmar ugu laabto!
Guudkayga nabarraa ku yaal, boogo gaammuraye
Feedhaha goshayduu damqaa, weli gunaadkiiye
Gurbood iyo dhallaan lama hambayn, gawricii dhacaye
Gabadh ugub ah, oday gaabiyoo, Socodka goynaaya
Gadhcasiyo dhallaan kama ay tegin, gaasaskii helaye
Gooddiga Wajaaliyo, Burciyo, go’o nawaaxeeda
Guudka Ceerigaabiyo, Berbera, godanka Shiikh yaallo
Gabaahiir Hargeysaa la baday, Maalin gelinkeede
Gaal baaba loo soo dalbaday, gelelefkaygiiye
Guullaha Raxmaankaa baxshiyo, Geeljirii kacaye
Inaan gaag ka hadhin baa tashiga, loo guddoonsadaye
Intaas oo guhaad igu dhacdiyo, aafo igu geydhan
Inaan godob ku seexdiyo ma rabo, aano iyo giire
Goosashada adaan Faaraxow, gawska ku adkaynin
Gar ninkii akhriyay waa inu, xaqa ku gooyaaye
Gobollaa israaciyo mar bay, garo irmaanaatay
Waxba beri gu’ baa lays ogaa, gaawe haw culanne
Godkaas waxa fadhida xaajo aan, laga geyoonayne
Laba gudub ahaatoo tolnimo, guudka ka wadaagta
Geelaaga oo kuu tarmiyo, kayga garabjooga
Gacal, gacal hantiyay ay farxadi, Gunudday laabtiisa
Gobannimo bartaasay jirtaa, garashadeed qaado
Geeraarka maantana waxaan, talo ku soo gooyay
Gacalow ha marin surimadaad, gabayga qaadsiiyay
Anna gocasho taan qabo xumaan, ha igu gaadhsiinnin.

aragtidaada nala wadaag...