Mahadnaq

Inta aanan u mahad celin dadkii gacanta igu siiyey diiwaankan qoristiisa waa inaan xusuusanno xadiiska uu Rasuulku (naxariis iyo nabadgelyo korkiisa ha ahaatee) uu ku yiri:

[arabic-font]قال رسول الله ﷺ: ’من لم يشكر الناس لا يشكر الله.‘[/arabic-font]

Taana macnaheedu waxay tahay, “Qofkii aan ku shukrin oo u mahad naqin dadka, Ilaah kuma shukriyo.” Xaqiiqdii waxay tahay inay jiraan dad dhowr ah oo gacan, maskax, hiil iyo hooba igu siiyey soo saarista buuggaan, Ilaahayna waxaan ka baryayaa in dadkaas oo idil abaalkooda u gudo. Nasiib darro halkan kuma wada xusi karo dhammaan dadkii gacanta igu siiyey buuggan, waxaase tixgelin gaar ah mudan oo aana marna hilmaami karin dadkan hoos ku xusan:

a. Abshir Nuur Faarax ‘Bacadle’ oo ii suurta galiyey in uu i siiyo gabayadiisa inta uu hayey, isla markaana ii oggolaaday inaan uruuriyo murtidiisa qiimaha leh, waqti badanna ku lumiyey sidii uu arrinkaa ku suura gali lahaa, isla markaana wax igala qabtay inaan helo gabayada badankood sababaha ay ku baxeen iyo waqtiyadii uu curiyey, waxaana xaqiiqa ah in la’aantiis aan waxyaalo badan oo diiwaankan ku jira aan la ogaan lahayn hadduusan inoo fududaynin ujeedadooda inkastoo qaarkood ay dhibaysey.

b. Cabdullaahi Macallin Cabdiraxmaan (Abuu Usaama) oo qayb weyn igala qaatay ururinta iyo fahamka waxyaalaha dahsoon oo ku soo arooray gabayada. Waxaana oran karaa, muddo aad u badan ayuu igala shaqeeyey diiwaanka dhammeystirkiisa, dhiiri galin wayna waa uu igu beeray. Waxaa kaloon iloobi karin kaalinta ay ka qaadatey soo guurinta gabayada qaarkood Raxmo Maxamed Cali (Ummu Usaama) oo ah afada Cabdullaahi Macallin Cabdiraxamaan.

c. Cabdikariim Cismaan Cibaar oo isaguna ina siiyey gabayo badan oo uu qoray kana soo guuriyey cajaladaha. Waxaana oran karaa gabayada aan ka helay Cabdikariim Cibaar waxay ii suurto galisay inaan ka saxo gabayada aan horey u helay oo aan barbardhigey.

d. Waxaa isaguna mahad gaar ah mudan Sheekh Jaamac Cumar Ciise (Alla ha u naxariiste), oo igala taliyey arrimaha qaarkood, iguna sharfay inuu hordhig u qoro diiwaankan.

e. Sidoo kale waxaa mahad is ka leh Dktr. Shariif Saalax Maxamed Cali (Alla ha u naxariistee) oo wax badan aan ka faa’iidaystay gaar ahaan, taariikh nololeedkii shakhsiyaad muhiim ah oo ku soo arooray diiwaanka iyo isagoo igu dhirri galiyey dhammaystirkiisa, maskax badanna igu kordhiyey kuna sharfay buuggaan milicsi uu kaga hadlayo aragti suugaaneed oo xeel dheer.

f. Waxaa kaloo mahad mudan oo aanan marnaba hilmaami karin Faadumo Cali Aadan oo gacan igu siisay buuggan, gabayada qaarkoodna wax ka qortay, ka dib markii ay cajaladaha ka soo guurisay, isla markaana ii suuro galisay jawi wanaagsan, marwalbana igu boorin jirtay dhammaystirka diiwaanka intaanu degganayn magaalada barakaysan ee Makka al-Mukarrama.

g. Axmed Sheekh Cabdixamiid oo isaguna gacan buuxda naga siiyey ku garaacidda buuggaan kombyuutarka, aadna
isugu howlay inuu hagaajiyo hawshaa.

h. Cabdinaasir Xuseen Cali (Abtiile) oo isaguna qayb aad iyo aad u wayn ka gaystay garaacidda Diiwaankan iyo dhammaystirkiisa marxaladihii danbe isaga iyo bahda Machadka National Computer Institute.

i. Sheekh Maxamuud Foolweyn oo isagana qayb weyn ka qaatay caddaynta meelo iyo rugo soo arooray. Gabayada iyo fasiraadda ereyo daahsoon, isla arintaa waxaa qayb iga siiyey Shiikh Axmed Xaaji Maxamed Cismaan (Axmed Imaam) oo labadooda aan ku wada nooleen Makka al-Mukarrama.

j. Waxaa iyaguna mahad iska leh ardadii wax ka baranaysay Jaamacadda Umm Al-Quraa ee ku taalla Makka al-Mukarrama ee dalka Sacuudi Carabiya, kuwaas oo muddadii aannu wax ka baranaynay iga caawiyey guurinta iyo qoridda gabayada qaarkood, gaar ahaan: Maxamed Sheekh Xasan Faqi (Qoryooley), Xassan Dhaqane (Ugaaska) iyo Maxamed Xaaji Cabdi (Afgooye), Ilaahay dhammaantood ha ka abaal mariyo.

k. Ugu danbayntii waxaa mahad leh Madbacadda Shirkadda Skaansom oo suurtagalisay inay soo saarto buuggan, gaar ahaan qoraaga weyn Maxamed Shiikh Xasan oo howl badan ka gaystey sixitaanka iyo isku dubaridka daabacaadda labaad ee buugga.

1 thought on “Mahadnaq

Leave a Reply

Your email address will not be published. Required fields are marked *