Tixdaan gabayga ah waxaa uu Abwaan Abshir Nuur Faarax Bacadle kaga hadlayaa xadhiga loo geystey wadaadka lagu magacaabo Shiikh Maxamed Ismaaciil oo ku xidhan Hargaysa una xiran maamulka Soomaalilaan.

Haddeey aqoonsi helayaan kufriga ka hakan maayaane
Waxeyna ku hadlayaan been cad oon harag la saareyne
Harka meera in ay dunidu tahay hoos umey dhugane
Warba uma hayaan Sheekhu in uu boqorka hoos joogo
Iyagoo hurdahayuu Rabbi u hoorsanahayaaye
Oo magacyadiisii hufnaa la hal-haleelaaye
Oo ay ilmadu hibitiqdaa oo uu laabta ka hingoone
Oo Aydhis ku habaarayaa wuu la helayaaye
Rabbigiisa wuxuu heybsadaa hubanti weeyaane
Kuwa meesha ku hayaana waa ka hor marayaane
CabdiMajiid halkii uu mareey ku hafanaayaane
Hangashti iyo sahankii horeey haabanahayaane
Hogga madow haddii lagu rideey qabar helayaane
Adduunyadana meel hoogtay bey ku hambasaayaane
Saddexdii Ha gaabtaan tirshoo dhaari may harine
Innaba diinta sharaf uma hayaan howl-wadeennaduye
Waxaa kala haboon caalamkooy horay u raacaane
Haddeey aqoonsi helayaan kufriga ka hakan maayaane;
Waa hoos ka gaal nimeey Tikruhu u hambalyeeyeene
Hubal iyi Cusana madaxa wow hoorinahayaane
Hadyigiyo waxyigii Nebiga magac un bowga soo haraye
Mar Soomaaliweyn ka hoos baxdeey sharaf u haystaane
Nebiga Muxamad kuwii ka horyimide diiday hadalkiisa
Dhibuu nagu hayaaa bey dhaheen kii hanuunsaniye
Hawaayadeenu waa inay xornimo haysataa abide
Hidda-raaca odayadaa sharciga kala haboonaaday
Fircoon Muuse wuxuu uga horyimid una hujuumaayey
Nabadiyo habkaa dowladnimo hayga kala tuurin
Bad baa lagu harqiyey dhaxalkina Muuse woow haraye
Hargeysana inta hanuunsan bey ka hortegaayaane
Hadyigiyo waxyiga kuwa rabeey cadow u haystaane
Hawaayadleyda iyo muusigeey u hambalyeeyaane
Heesaha Nebiga loo tumiyo hiiha ma oyaane
Inay diintu na hoggaamiseey qadaf u haystaane
Hanka Qaranimiyo taariikhda hari ku hamin maayaan
Saqrada iyo hididiilka iyo hoobaalkow taliya
Markeey laanta Hereriga hayaan heestuneey yabaqdo
Haadaan madow bey yabaal ku hirgisaayaane
Halaasigu wuxuu kicinayaa hiira hiiraha’e
Waxey ka halgameen waxey heleen, haatan waxa jooga
Halkii ugu xumeyd waa markeey Diinta hororeene
Habkeey ula dhaqmeen Sheekhii baan marag u haynaaye
Jirdilkaan shaashadii ka hubsanaad maya-da haysiine
Intaad hoos u leyseen miyaan kun iyo hee gaarin
Hilibka Sheekha waad iibiseen waana la hubaaye
Halkaa ruuxu yuu kaga bixine horay u soo daaya
Hadalku isma saarnee dagaal waa lama huraane
Awliyada la hubeey dilaan ama hujuumaane
Oo dhiiggoodii bey heemiyeen howlwadeennaduye
Qabuurana gacmeey u hoorsadaan aan waxba u hayne
Oo Suufi hebel bey muraad u hor fadhiistaane
Waxbana kama helaan, tii Alleey kan u hibeeyaane
Kuwa naartii ku hafteey Jannadii heybsanahayaane
Hadyigiyo waxyiga Foojerigeey kaga horreeyaane
In Buush loo hibeeyey dunida haanka geliyeene
Haddaan gabayga nuxurkiisa iyo hadalkii soo koobo
Insha Allaahu idinkaa hormari Sheekhu wuu hariye
Xabashidu dadkeey naga hayaan waa halgamayaane
Hargeysaa Tigriihii caashaqdoo u hanqaltaageysa
Oo kilil lixaad seey u helaan u hanbabaaseysa.

Waa maansadii saddexaad ee ku soo aroorta diiwaankan ee uu abwaan Abshir Bacadle kaga hadley ama ku soo qaatay maanso uu ku roob doonayo, Ilaahayna kaga baryayo roob iyo raxmad inuu siiyo dhammaan geyiga Soomaaliyeed iyo meel ay Soomaali degtaba.

Ilaahow adigaa hodan ahoon kuu han weynahaye
Wax addoon ku haybsadana waa heli kareysaaye
Adoon howl u marin baad si fudud ugu hibeysaaye
Annaguna cirkoo haar cad baan hogol ka dhowrnaaye
Allow hooriyoo noo hibbee Haariyaa timide
Jubbada hoose Hiiraanya Gedo halkan aan joogno
Hobyo Godan hadaaltimiyo Meydh helinki Boosaaso
Ilaahow Hargeysiyo Burciyo hilinki Laascaano
Howd iyo Doollo kuma heyno roob tan iyo Haadaamo
Shabeelaha kan Hoosiyo kan Dhexe holanki soo gaarye
Dalkii cadowgu naga heystay waa la hal wadaagaaye
Allow roobka naga haqabtiroo dhibicda noo hoori
Allow beertu hilantoo miraha hoosta laga tuunsho
Ilaahow abaaraha na helay roobaan ku hilmaanno
Hana u yeelin hiirtaanyo iyo aafo na haleesha.
Ilaahow waxaan ku haminnoo hoosta uga guuxno
Adduunbaa lagaa heli karaa oon ku heybsadaye
Galhareeri iyo Habaritiil hoygii Xarardheere
Halabooqad iyo Gaalkacyiyo Karin Allow hoori
Hilmo iyo Colguuliyo Dhanbeyl Eebboow ku hagaaji
Hooygii Baxdiyo Qaydariyo heeladka Cadaado
Halkii digirta laga heli jiriyo dabagaluu hoori
Ilaahow hillaac biya sidoo hooriyoo dhaliya
Oon qolana ku hungoobinoo lagu harraad beelo
Oon loo hayaaminoo ratiga hilayga loo saarin!

Shirib:
Afar walxaatoo a ku taal Ilaahay kaaga aallimaa
Xaq aasoo eex qabiil u yeel Ilaahey kaaga aalimaa
Amxaar raac itixaad necbaaw Ilaahay kaaga aallimaa
Anfac ku doon qof soo afduub Ilaahay kaaga aallimaa
Laguma arkee iska yeel Ilaahey kaaga aalimaa!

Waxaa gabeygan uu Abshir Bacadle tiriyey isaga oo jooga magaalada Jedda ee dalka Sacuudi Carabiya taariikhdu markey aheyd 1985kii, kaddib markii loo soo sheegay qiso ka dhacdey magaalada Muqdisho oo aheyd in wiil ay ilma adeer yihiin oo la yiraahdo Cabdi Cusmaan Faarax oo ka tirsanaa xerta sheekh Cali Cilmi Yare markaasna ka yimid siyaaradii sheekh Aweys ee Biyooley isaga oo aad u jirran. Markaas ayaa nin ay qaraabo yihiin oo la yiraahdo Axmed Xuseen Mahdi oo ku magac dheer Nin Gubtey oo ugu tagey booqasho xaruntii xirta ay degganeyd kadib xirtii iyo shiikhoodii ay kala hor yimaadeen dagaal meeshiina dhaawac loogu geystey iyagoo u arkayey inuu yahey bidci ka soo horjeeda Dariiqadooda, Abshir isagoo arrintaas ka carreysan ayaa waxaa uu yiri:

Markaan gabayga heen seynayoon kala habeynaayo
Waxaa looga haqab beelayaa hibiyo liishaane
Hordhacayga ruuxii gartaa miidda wuu heliye
Hambashada salool qaraxa waa lagu haraadaaye
Haamaha aglooshaa u dhiga sidigta haaneedan
Ku helliya markey godol heshaad ka hirqaneysiine
Iga hooya caawey murtidu haybad leedahaye!
Nimanyahow hawada beena waa lagu hungoobaaye
Waataan hayaan dheer ku imid hawlna soo maray e
Hagoogtiyo hubkii culimadaa la igu haystaaye
Hordaybaa la yiri laaxinkaan hoobiyeyn jiraye
Uma haysan Faataxada waad ku hakanaysaaye
Raggii noo hormaray qirada waa naga halleeyeene
Na habowshe nimankii xadrada haadiglayn jiraye
Iyagoon halla aqoonin bey magacyo heysteene
Higlayga iyo garaskiyo raggii quraca hoos joogay
Waxaan horumar moodeyney bay nagu habsaansheene
Raggase weli ku haray baan farriin hooya leeyahay e
Idinkaa hameen iga xigee hadalkan gaarsiiya
Harag weyn u sheeg laaxin baa lagu hoggaanshaaye
Haab-haabashadu wey eg tahay haatan dabadeede
Heli waayey malag haadayoo hab igu siiyaaye
Hamuunta iyo oonkaan u qabo shiikha hadalkiisa
Isagoo qof kale la hadlayaan hawku leeyahay e
Hamiin qura tajwiid inaan bartaan ku hindisoodaaye
Sidii horana maahiye beryahan waa holinayaaye
Afartaa habeeyaye waxaa huriyay laabtayda
Nimankii hagoogaha watoo hoos u wada jeeday
Huuraalayaalkii Shirkiga lagu horeynaayey
Nin Gubtey heleen baa la yiri haramcasyaalkiiye
Haaweyda qurunka le’ dagaal ku habin weydeene
Iney libin heleen bey la tahay lana hoyaadeene
Geedkaa humbulanoo naflaha lagu horeynaayo
Dhaaxaan hubsada idin lahaa oo ka soo hara’e
Wax dhanbaan huruufaye warkaan hoos idiin geline
Markaan hiifo hadalkeyga waad hororsanayseene
Haddaa la arkay waxey hurinayeen haramcasyaalkiiye
Cabdi haara weyniyo midkey habar wadaagaanba
Hambadaan adeer uga tagnoon ka harney weeyaane
Towxiidka waa laga harqiyay hanadadiisiiye
Maraanse helaba towxiidka waan ka harqin doonaaye
Oo haykalkiyo sixirka waan ka hufi doonaaye
Markaasey tixaan hooriyaa ii habboon tahaye
Iska heysta wiil habaar qabow uma horreyaane!

Gabeygaan waxaa uu Abshir ka mariyey warshaddii Ifka Xalan oo ku tiil Muqdisho oo ayna ku shirsanaayeen beelaha Habargidir iyagoo ka doodayey sida ay u taageeri lahaayeen dowladda lagu soo unkay magaalada Carta ee dalka Jabuuti, iyo si loo heshiisiiyo beelaha Sacad iyo Cayr oo isku dhacay waayahaa. Wuxuuna Abwaanku yiri:

Anigaa Hawiye kaa aqaan heybna kaa xiga e’
Hiddiyo dhaqan waxay u leeyihiin hagar walaalkoode
Hadmiga iyo dumintey si ba’an ugu horreeyaane
Habaar bowga dhacay dowladnimo waana la hubaaye
Waxay dad u halaageen la sii hananna waayeene
Guushii walaalkood helaa ma hambalyeeyaane
Is hortaaggu waw dhaqan asal hibana loo siiyey
Garta kuma hishiiyaan haddaan dowlad loo heline
Waatay Cali Mahdi u hagarbexeen hoobiyiyo caaye
Ha loo daayo labadaa saney igu haruufeene
Waxba lagama helin aan ahayn dhibyo hiintaayo
Tacsi ka hakratkiibaa ahaa jac iyo yaahuu’e
Cabdi Qaasimoo habar wacdoo hiil ka filanaayey
Hamiguu u qabay iyo bal daa hilib dhaqaaqeeye
Hunduus kaga fog nimankuu islahaa ku hagranmaayaane
Cad Soomaali laga soo heloo hibo naloo siiyey
Oo laba ninoo Habargidira haad ku kala qaaday
Nin hungiri ka galay nagama dhalan helina uumaayo
Haadaantu waxay idin la tahay hilinki toosnaaye
Is hamba qabta taariikhdu wey hari insha Allaahu!

Shirib:
Haddaa hashiis maqnayd hesheen, mawaydnan isku hayb ahayn
Isma hurteysku hiilisee, ninka hayaa hunduus miyaa!
Hadal nin weyni waa heraa, heshiis la diido waa halaag
Wexeysan hadda kaa heleen, amaa hadhowdi heybsataa!

Waxaa uu tiriyey Abshir gabaygaan iyo kuwo kaleba markii qarankii Soomaaliyeed uu dumay, dawladdii jirteyna la riday sanadkii 1991dii, ka dib dadkii soo harey ay dil iyo dhac isula dhaqaaqeen, gabyaaga oo muujinaya nabadda iyo dib u heshiisiinta ummadda ayuu gabaygaan noocan ah tiriyey:

Soomaaliyey hadal yaroo huriyey laabteyda
Oon haysan kari waayey baan soo hinganayaaye
Hawadaanan soo marinayaa hiidha waaberiye
Hoggaamadiyo shacabkaba talaan soo hordhigayaaye
Iga hooya caawey murtidu haybad leedahaye
Jabhadaha hubeysani beley naga hor qaadeene
Anoon qolo hormarineyn qolana hoos u dhigahaynin
Hanbalyiyo ducey naga muteen hagar la’aaneede
Heshiis waara howl mira dhashaa heegan loo yahaye
Ilaahey inaan heybsanana way habboon tahaye
Hadyiga Nabiga oo lagu dhaqmiyo haybta laga faano
Labadaa heshiis iyo midnimo kama horreeyaane
Rabbi baa hidaayada watee hayna garansiiyo
Hubkana inaga dhiga waxeynu nahay hooyo ubadkeede
Oo guusha layskuma hubee hororka aashiina
Mooryaan hubeysani beley noo horkacayaane
Hanti iyo dad hoygey galaan hal uma reebaane
Hambana kama tagaan hadafna ma leh horarka mooyaane
Haddaan laga hortegin wacad Allaad marin habawdeene
Hubka innaga dhiga waxeynu nahey hooyo ubadkeede
Oo guusha layskuma hubee hororka aashiina;
Har qabow hurdiyo caafimaad haybadiyo raaxo
Haruub buuxa hogol rooba iyo wiilal hana qaada
Hooyiyo carruurteed bed qaba odayo haasaawa
Hantidiyo naftoon loo baqeyn hadada mooyaane
Iyo hodantinnimo waa markii nabad la haystaaye
Hubka innaga dhiga waxeynu nahay hooyo ubadkeede
Kii horaa hamuun baas u qabey hooto dhiig surane
Oo tobanka haybood ka dhigay holacyo baasiine
Ninna horumar kuma gaari karo hilib walaalkiise
Waxaadse haybad leedahay intaad garabka haysaaye
Waa hibo Ilaahey midnimo lagu heshiiyaaye
Hubka innaga dhiga waxeynu nahay hooyo ubadkeeda
Oo guusha layskuma hubee hororka aashiina
Hiddaha iyo dhaqankii intaan hadurku aafeynin
Waa laga heshiin jirey dagaal tan iyo Haabiile
Habka nabadda odayaashu waa heli ogaayeene
Cid waliba wixii laga hayaa loo hibeyn jiraye
Markeynu hadallo hor Ilaahey baa loo heshiin jiraye
War maxeydin helay meel un baad ka hifaneysiine
Hubka innaga dhiga waxeynu nahay hooyo ubadkeede
Oo guusha layskuma hubee hororka aashiina
Heeraar gobeedoon ergada haybna laga waayin
Oo horey usoo dhaafa iyo hab iyo maamuusle
Oon haba yaraatee dakano la isku hiifeynin
Oon huq iyo cudur nooga jirin hoos isaga tuurka
Hayeesheese haasaawahaan lagu hambeyneynin
Hurgumadiyo hagardaamadana hubanti loo baaro
Oo daacad loo wada hadlaa lagu heshiiyaaye
Hubka innaga dhiga wexeynu nahay hooyo ubadkeede
Oo guusha layskuma hubee hororka aashiina
Ama igu handada waa waxaad hor utaqaaneene
Hakad geli wax baa ii hariyo hadallo waaweyne
Siduu hadurku noo galey haddaan how mar kaga siiyo
Hangash iyo Maxkamado u hayina hadalka Daaquudka
Ilaalladii hameen mirashadiyo hadalka loo qeybshey
Hooyooyin iyo Guulwadiyo habaqle dheeraada
Higlay buuro Haayaajirow habarta bowdkeeda
Hogii Foorta shiikhoo Xisbiga haybta lagu miiray
Godkii ii haydiyo baaristoo labada hiiroole
Hangar hoosti haadaan ka qodan birana loo heegay
Huf inuu akhyaarta uga dhigay war uma haysiine
Harcad inuu wadaaddadi rasaas hawda kaga saarey
Haweenkiyo carruurtiina uu Bii.Em ku hoggaanshey
Aqoonyahanna kala haajiroo dunida heehaabay
Wixii harayna ii heesa yiri war uma haysiine
Ku heshiiya calankaa intan hadurki soo laaban
Hubkana innaga dhiga wexeynu nahay hooyo ubadkeede
Oo guusha layskuma hubee bororka aashiina!

Guurowgan waxaa uu Abshir Bacadle ka soo jeediyey Hoteel Kaah oo ku yaalla magaalada Muqdisho, mar ay ku wada kulmeen beelaha Hiraab ayagoo lagu wada heshiisiinayo halkaa, tixdaanna waxay ahayd furitaankii kulankaa nabadaynta, maalin khamiis ah 13kii bishi 1aad sannadkii 1994kii. Si wayn ayaana loogu riyaaqey, waxaana la oron karaa dowr wayn ayuu ka qaatey nabadeynta beelaha Hiraab ee ay colaadda ba’an dhex mertay. Waana sidatan.

Hiraaboo heshiiyoo aqbala hadalka iimaanka
Dhaaxaan Rabbigey haybsadaye maanta waan helaye
Kuwii hiilka ii gali lahaa waa isku hubaayee
Inaan hallayney waan wada hubnaa hilib walaalkeena
Masa haroo haf lama siin karoo haatanba ogaanay
Nimankii halkaagaan ogaa hoos isugu jeedshay
Hiraaboo isku hiloobey waa kan isku haanyoodey
Hanbalyaan anna usoo gudbiyey hagar la’aaneede
Insha Allaah heshiiskii imaam waa hirgalayaaye
Hoggaankeedu Soomaali waa hibada noo taale
Waxayse hoogtey waa maalintaad naga haleysiine
Yaan lagu halaagsamin tolow hadalka iimaamka!

Gabyaagu wuxuu tiriyey gabaygaan xajkiisii labaad 1982kii, markii uu la cajabay hawlaha xajka iyo acmaashiisa wuxuuna yiri sidatan:

Ilaahow adaa haybadloo hodan ahoo weyne
Wax addoon ku haybsaday adaan hawl umaraheyne
Irbad hirarka maanyada la daray oo haf laga siiyay
Hibitiqa yarey qaadatoo haysta madaxeeda
Baddu uma haraadoo ma oga iney ka haysaaye
Adiguna habkaas baad weliba heer ka sidataaye
Inta kuu hareysaa ka badan waxaad hibaysaaye
Ismaaciilya hooyadii markii baydka la horkeenay
Ibraahimna uu ka hinqadoo socodka haab haabtey
Waxey tiri waryaad nagu haleyn meeshu waa halise
Ma Ilaahey baa kula hadloo halkan noo dooray
Haah buu ku yiri waa sidee boqorka hoos jooga
Sida habarquraafiya ma oran hoogayoo ba’aye
Hadal waxey ka tiri idan markaa ina halleyn maayo
Isaguna baryuu si habsamiya haybad ugu taahay
Habka boqor wax loo weydiiyuu diinta ku hayaaye
Habaar-qabe quraafiya sidii muu hantaaticine
Nimaan tiisa wax u heynin bey u hanqal taagaane
Waxba yaanan haab-haabanine aan kasoo haro’e
Iyagana Allow soo hadee naari waa halise
Wuxuu yiri halkaasaan dejiyey waana ka hijroodey
Baydkaagi baan soo hordhigay haybada lahaaye
Hab saraaco malahoo Rabbiyow waa gabaahirige
Adaan kugu halleeyee arsaaq yaaney heli waayin
Markey gabanka haaneedisoo haysan kari weyday
Waa tey halkiisii dhigtoo buurta ku haliishey
Saffey ugu horreysaye waxay ka hanqal taag-taaba
Waatay ka soo hoobataye ay Marwa u haaday
Hareeraha markey dhugatayoo ruuxna heli weydey
Hublaha iyo orodkiyo waxay socodka haysaaba
Iyadoo dhib iyo howkar iyo gaajo hadal deysay
Waa tay ka soo hoobataye hoos usoo degatay
Hammigeedu ma aheyn biyaad ka harqaneysaaye
Boqor gaajo lala hoos galoo gacanta loo haadshey
Oo hoorso yiri baad ahayd waana la hubaaye
Waa taad biyaha ka harqisoo lagu haraad beelay
Oo waatay gacmaha ku habbisoo hawda kaga saadhay
Anaguna halkiiyoo kalaan ku hamineynaaye
Mar haddaan Shirkiga kaa hufnaye hebeladii tuurney
Oo aanan hayb kala laheyn heerna kala joogin
Inaad hoorsadaay leedahaan laabta ku hayaaye
Inteena meesha soo horan Rabbiyow hayna kala reebin
Waxaan ku heybsaneynaa janaan naari ka horreyne
Yaad nagu hallayn waxaanu nahay hoomadaa tubane
Ibraahiim Rabbigey kuma hungeyn hadaladiisiiye
Ducadii hufneyd buu ku helay hibiyo dheeraade
Adduunyada intuu haybsadaan harac ku joognaaye.
Aakhirana hoygiisa waa loo han weyn yahaye
Ismaaciilya Haajarana waa la hal wadaageene
Habarya odaya wiil qoosku waa hanuunsanaayeene
Hayeesheese aadmiga uunbey la hal wadaageene
Rabbigii hiddaayada baxshaan mahad u heynaaye
Halkii nabi Ismaaciil cirbaha ku hanhanteelaayey
Haajara isma laheyn biyaa laga helaayaaye
Mana haysan Riig iyo Mishiin loogu howlgalo e
Rabbi bow hibeeyaye cidina hoos umey qodine
Samsamkii ishiisii hardiday dhagax ii haar weyne
Oo soo halciyey biyaha waa loo haraad qabaye
Waa haanti ugu khayr badneyd hilo biyoodkeena
Oo aan dhul kale laga helen halakan mooyaane
Oo loo hamuun qabo dunida hareere heedoo dhan
Oo Xaramka lagu haqab tiraye hibada loo siiyey
Tixdan hooriskaan reer Xijaaz kula hadlaayaaye
Ma habaarayee gabayga waa ku haddadaayaaye
Waa hoga tusaaleynayaa haba nebcaysteene
Muslimka idin haaraamayaa waa idiin halise
Ibraahiim hortii maydan hayn hibiyo liibaane
Hanfigiyo Jasiiradda Carbeed holanki qiiqaayey
Harraadka iyo gaajadii badiil waabad u hesheene
Cagsigoodi baad haysatiin waana la hubaaye
Barwaaqadaan ducaa lagu heliyo hanasho towxiide
Duul kaan xamdi u helinna waa laga haleeyaaye
Haamaha nimcada yaan la qubin talo ma haysiine
Ooy aan hoogii reer Saba qabsadey helin dagaankiina.

Gabaygaan wuxaa uu ka hadlayaa asal wanaagga Asharaafta, waxa uuna gabyaagu ku amaanayaa reerkaa isagoo ka xanuunsaday sida dadka qaarkiis ay u arkeen inay yihiin laangaab iyo iyagoo aan la marsiineynin sharafkii ay lahaayeen.

Nasab loo nisba sheegto
Iyo nikaax lagu faano
Naftuna ay ku nagaato
Waxaa iila nadiifsanoo
Iila naala wanaagsan
Nasabki reer Bani Haashimoo
Cali loo nisba sheegtoo
Nabigeenu jeclaa
Waa nuureynkii yar yaraayoo
Nabigeenu xabaarayoo
Niyaddiisu jecleydoo
Naftiisu ay ku arwaaxdayoo
Allanoow naxariistay oo
Nasiib kooda ka yeelay!
Guri nuur ka baxaayoo
Nabigii u duceeyoo
Nal towxiid ka ifaayoo
Nashaadkiisu baxaayoo
Ilaahay wax nusqaana
Iyo naarta ka dhowrey
Nuxurka diinta la siiyoo
Naseexadii Nabigeeniyo
Nugaylkii Muslimiintiyo
Gaaladoo la nebcaadiyo
Tawxiidkoon la nusqaamin
Iyo Nabigoo la jeclaado
Waa nactigii Asharaaftiyo
Nuurki reer Banu Haashim
Oo nasiibka badnaaye
Tixdan sidaan u nidaamshiyo
Nusradaa Ahlu Baydka
Niyad wanaagsan ku qaatoo
Nabdigiina ka buuxshoo
Nacaybkii Asharaafta
Iyo nuqsaan lagu sheego
Niyadiina ka dhowroo
Nasabkooda ilaalshoo
Nabigii ku xurmeeya!

Geeraarkaan waxaa laga soo jeediyey furitaankii Maxkamad Islaami ah oo laga furayey goobta warshaddii Ifka Xalan ee ku tiil Muqdisho, sannadkii 1998kii, waxaana maxkamaddaas qaban qaabadeeda iska lahaa beesha Cayr ee Habar Gidir.

Ayaantii Ina Siyaad
Arlada ow ka talaayey
Isbaaradii Qoralooboo
Askarta Gaalgale joogtey
Hawiyow waa taa ka ooyi jirteenoo
Ka soo araara jirteenoo
Ina Salaad Booy u takteene
Afartankiina isbaaroo
Cadow Uul Aadan yabaal
Ekis Cakaara Afgooye
Ilaa albaabka Baraawe
Sida aleesha u daadsan
Ummadda maa laga qaadoo
Ilaahey maad ka baqdiin
Ma waxaan Islaam la eheen
Awood haddeydnan u heenin
Itaal kaleeto la waayey
Maxkamadaan maa ayidiin
Iyadaa ka adkaatee
Waa in kaarantihiin.

Shirib:
Isbaaro eedhiisey aheed waxaa uruurshey ahlu khayr
Amniya doola ogolaaw ama isbaara joog ahaaw
Odaan islaaxa oggoleen isbaaradaa ilmuu jiraan.

Waa jiifto uu abwaanku ku lafa gurayo waxa uu yahay caashaqa, sida uu u arko Abshir oo doonaya inuu tusaaleeyo caashaqa iyo maxabada runta ah waa midka uu ruuxu Rabbigiisa ka raalli yahay, waxaana uu murtidiisa u soo bandhigayaa hab cajiib ah oo uu u soo gudbinayo si isweydiin iyo wax isweydaarsi oo kale.

Caashaqu muxuu yahay?
Mingis iyo ayaamaa
Mayd iyo mariil baa!
Maya maya sidaa maaha
Marna miyuu ku soo marey?
Wax i mude manaan garan
Sidee baa laguu mudey?
Ma mas baa ma qodax baa?
Ma miisaan culeys baa?
Ma dabeyl maldahan baa?
Ma wax lagu marqaamaa?
Ma sun maanka damaqdaa?
Ma mariid ku saaqaa?
Maya maya sidaa maaha
Waa muraayado Ibliis iyo
Maqal iyo samaacado
Midiba ay mid aragtoo
Jasiirado madow iyo
Bad mugdiya ku yaaloo!
Indhuhu kugu maqiiqmaan
Miyifkuna ku laran yahay
Maya maya sidaa maaha;
Macnihiyo ujeedadu
Waa muusig iyo filin
Madadaalo iyo farax
Naftu hayska mirato ah
Maya maya sidaa maaha
Waa muusanow iyo
Naftu waxay u muhatoo!
Murugo iyo ciilba leh
Mukushuna qarsoon tahay
Qalbiguna ka maarmayn
Rabboo kaa masaxa iyo
Adoo mooda mooyee
Kugu mudan dawana male!
Maya maya sidaa maaha;
Waa makhaalin iyo dabin
Ibliis midigta ku hayoo
Macaasida u sahan shoo
Labo aan isku muhateen
Midba meel ka kenoo
Madaxa isku galiyoo
Muraadkiisu ku hirgalo
Maya maya sidaa maaha;
Labo wuxuu mideeyaa
Mowle isku qorayoo
Is moogaa markii hore
Waxaan muuqaneyn iyo
Rooxaan maldahan iyo
Muhasho iyo udug iyo
Falaaruu isugu mudi
Maya maya sidaa maahee;
Malo iyo hummaag weeye
Miliilic iyo dhagar weeye
Mugdi iyo iftiin weeye
Xayaato iyo mowd weeye
Macaan iyo qaraar weeye
Madow iyo cadaan weeye
Madal aan hirgalin weeye
Muusanow habeen weeye
Kaligaa marqaan weeye
Ismoodsii ku joog weeye
Muhasho iyo hamuun weeye
Maya maya sidaa maaha;
Haddii uu ku soo maray
Midba meesha uu dego
Iyo magacyadiis sheeg
Mayeeraan ku waa madiga
Ma eeguhuna waa nacaska
Ma seexduhuuna waa cudurka
Ma quustuhuna waa yoolka
Ma sheexana yabaal weeye
Shantaan magacoo aan mariyey
Maqaalin iyo dabin weeye
Moorada Ibliis weeye
Taba macaasiyeed weeye
Ilaahay ka magan weeye
Murug iyo halaag weeye
Maya maya sidaa maaha;
Midka caashaqa u mudan
Oo ugu macquulsanoo
Muslimku uuyan diideyn
Mudda dheerna soo jirey
Muraadkiis nikaax yahay
Macsi aan looga yaabeen
Masaafo aan la galineyn
Midigtaan la saareyn
Macna aan la siineyn
Qalbiguna u muhaneyn
Meher dabadi mooyee
Caashaqa macquulkaa
Miisaana lagu saxay
Miro iyo udgoonna le’
Miliilic iyo sharafna le’
Mansil iyo makaana le’
Aan idiin macneeyee
Maqalka i amaahiya
Waa muhiimo guur doon!
Oo aan macsi ahayn
Markii horana Mowlow
Muraadkeyga ii sahal
Oo aan macsi ahayn
Masaladaba lagu galey
Markaad minanka keentoo
Maxabada waraabtoo
Maqsuud aad ka noqotoo
Matalkii janada iyo
Meelaha uddgoonka le
Maashaa Allaahuye
Goortaad mulkido oo
Mayracato beeraha
Meesha hays ka aaline
Mayroo qubeesoo
Mowle u sujuudoo
Mahad iyo shukri u celi!