Gabaygan ta’da ah gugii la mariyey iyo ujeeddadii loo mariyey midna wax si fiican noogu tafaftira Daraawiish kama helin, wuxuuse na tusaaleynaayaa in Taleex lagu tiriyey, ujeeddadiisuna ahayd faallada adduunka iyo dadku wuxuu ku kacaayey markaas. Waxaa laga garanaayaa tiiraanyo, caloolxumo iyo tahara ceeriin oo Sayidka kaga yimid xagga Soomaalida. Mana dhamma sida gaadaalkiisa dambe laga garan karo. Wuxuuna Sayidku yiri:

Xuseenow tabtaan ahay haddaad, tu iga weydiisay

Tiiraanyadeydaa ku dili, tabada’eediiye

Maandhow wax lama taaqsade, toobso hadalkayga

Tixdoo keliya talo looma filo, taawada adduune

Tammadkii wax lagu iibadaan, taabud noqonayne

Tumun ribixa adigoo helaa, tiilku kaa dhiciye

Tabaalaha adduun baa ka badan, timaha xaadeede

Toogada dhibaatee laga qabo, tarabka weeyaane

Ragba towsta waa kula qabaa, taaha urugeede

Wax la taabay tacab baaqday waa, tarantar seeraare

Taageerka sicir baa ku iman, teelgaraafyada e

Waxa taarka lagu soo waddayn, wa tis kuu qorone

Tu’i weeye aan jirin hawada, tararaxeediiye

In kastaad arlada taakisoo, tahan fogeysiiso

Tubtii Eebbahay kugu wadaan, tigin ku dhaafayne

Turgi xoog leh adigoo ah bay, tahartu heedhaaye

Tayrshuhu mar buu reydabaa, taagabtuu yahaye

Maruun baa tijaaltii lugtii, turunturrootaaye

Taysuhu mar buu kaa guraa, teelka caanuuye

Tuurimaha geela mar baad, tuludna weydaaye

Maruun baad tirsaaskii hunguri, tigidhku rooraayee

Liishaanka toogta ah marbaad, tumul la weydaaye

Tuuryadu marbay leexataa, taakaleel tahaye

Maruun baa tumaatiga warmuhu, turuqa seegaane

Geesigii tilmaanna mar baa, fulay u tookhaaye

Nin tabiinno kuu guri jiraa, kuu taltaal noqone

Nimaan adiga kugu toosin baa, kuu takhaashamiye

Tafantoofka cayreed mar baa, laga tanaadaaye

Towqad xumo mar baa laga baxaa, talo Ilaahaye

Tarood xoolo laga buuxiyoo, taajiraa badane

Tusmadhigidda hodontooyo waa, tarar dabayleede

Waa tiix qayood maray markuu, tegayo miiskiiye

Maruun baa tar kaa noqonahayaa, tulushle meertaaye

      

Toddob da’ay tigaaddoo baxdoo, talaxu dheeraaday

Tasaq xamada geeda istacoo, tal iyo laashuusha

Tobbog faraq leh teysali curjina, tiico iyo laamo

Takhwad sano ah tuutiga cayada, tuducyadii saarka

Tax caleen leh tiirsiyo dherjiyo, tooska iyo fookha

Tarrax ubaha tay iyo caleen, taliya cawlcawllan

Tarrar layra laama istabacoo, turuqu xiimaayo

Tab cambuula taambuli lohloha, takhad waliilaaya

Tureed khalada taarma isqabsaday, takhas cagaaraaya

Tumbuc bacada tamuux jilicsanoo, lagu tardhabaayo

Tirintiga turuubta iskuleged, doc isu tuureenka

Takardhabadka rays tamashadiyo, tacab-ku-raaxayska

Tagsan garaba toolmoon aroos, tuujin iyo qaab leh

Taltallaabsi toos ugu adeeg, tabaradii qoyska

Taf-ku-jiidka mara taabsashada, toosintiyo hooda

Shir tawalay tol soo wada kulmoo, amar la tookhaaya

Taxaashaynta toobeyn xarrago, tamashlihii geedka

Tartan beder darmaan tooxanoo, talow u soo boodi

Col tamuumay torog laysu guray, toga ku saanyoodka

Hor weyn tiro leh rimay tiirsanoo, togoxu weynaaday

Tajal awra qaalmaha tofrimay, korommo taambuuga

Tebis goola awr toban jiroo, dhebi ku teesaaqday

Togoyada maqaar loo sidoo, kuray ku tookhaayo

Barqa tu’iska toobkaha xumbada, toolinkiyo xoorka

Timir dhalay tanaagtiyo qumbaha, loo tigtiginaayo

Tirsiis ido ah sumal looga tegay, wanan tabaadaaya

Riyo toolin laga soo lisoo, tiriyo dheeraada

Tabiin badan qaraabooyin tuban, tuurcaddaha wiila

Haddii lagugu taakulo intaan, tiriyey oo sheegay

Waxaan adiga kugu taawilleyn, kuma taseecaane

Tufna kuma lilleeyaan waxaan, kugu tadcaareyne

Tunni kuu caddaawa ah mar baad, tabaro mooddaaye

Nin tusaaledage ahaa baa, kaa tawaan cuniye

Waa tacab-khasaar gaal ninkii, toobaddu wacaye

Adigoo tacliiminahayuu, kaa tartariyaaye

Goortii la taa’ibi jiraa, balo taltaashaaye

Tortooraha uraayey sidii, ey u taabiciye

Talgalkii xumaa baa futada, lagu tarraajaaye

Wax takoorimada loogu xiray, tarash najaaseede

Waxay kheyrka uga tooban, waa tootir iyo naafe

Ibleyskii ku tabantaabiyaa, taw dhe soo orone

Wax taggooda laga yeelayaa, tooci iyo naare

Tan baaruuda un bay ka qubi, tooxda badanaade

Teygari Caleed bay ka ridi, tooda nololeede

Tixintiga wiriiriga ah bay, tabaxsanayaane

Tallal’ay waxaan hurin ninkii, gun u tawaabayne

Nin ragaa ku tabantaabiyee, tuug abaal ma lehe

Goortuu tabiinada cunuu kaa, tubbanayaaye

Soomaali¹ anigaa tamminay, tiilka ay tahaye

Anigaa tafniday meesha iyo, toban jirkeygiiye

Anuu iga ta’wiishaa ninkaan, tooda garaneyne

Waa wada tukiye fule hadday,rag isu tookhaane

Goortii la taabtamo dagaal, kama tix qaataane

Markii tooratooruhu kacay, sii tubbanayaane

Turufleyda gaalaad xarbada, uguma tookhaane

Goortuu kufrigu soo timley, sii tawalayaane

Waxsey sii tawaawici intaan, taabka loo imane

Tagooggood wuxuu jabay markuu, taabo xoolaha e

Taraaraha ku yaal oogadaa, lagu tibaaxaaye

Tiiriga sidii loola dhacay, talal ma daayaane

Waa tarikiin aan salaad, taqabbaleyneyne

Tukashada Fircoon baa ansixi, waa tu aan jirine

Towxiidka Eebbiyo sharciga, wayan taalihine

Talaabuucsanoow ferenjigey, talo ku raaceene

Waxay uga tabaabulahayaan, inuu taxuubshaaye

Sidii nirig tushuumaaya bay, daba tushleeyaane

Tacaddiga Islaameed ka jecel, timirtii doocaane

Daraawiishta teedahan ka neceb, tiirridoo idile

Intii ay tafriid uga dileen, toban lag weeyaane

Tif karaamo awgii lahaa, uma taxniigane

Ninkii ayan tooda uga biqin,uma turaayaane

Culimada tuxfaha yeerin waa, ugu tiraayaane

Sheydaan ninkuu taba baraa, malaha towfiiqe

Ka tasoobe dowgii jannoo, toobiga ahaaye

Waa wada tijaal looga tegay, togaggii naareede

Tuxle iyo gaadmo iyo khaatirnimo, taraddan weeyaane

Tax hilibo ah tebbada dhaansan bay, turugga saaraane

Muskuun bay tafaayaan intay, tafaha xaytaane

Wuxuun bay tafaafuli sidii, yibir sin taareede

Tuur talaadiyo dug bay, turub ku jeexdaane

Tamiin min iyo faal bay tusbaxa, tororogleeyaane

Tumaalliyo talaamiid ka siman, tololoh beenaade

Haddaad kula tacaashana run baan, laga taxniigayne

In kastay tallaahida maraan, waa tu’ aan jirine

Naagaha tigaaddii la furay, kama tegaayaane

Qiil tahanti uma saarsadaan, tiirisboodhaduye

Waxay kula tacaalaanba waa, tu’is qaxaabeede

Tiglawiligta sacab bay kurtood, tar u qalaadaane

Tuulada wax laga yeerin waa, toolin dhooblaha e

Taraawiixda soonka ah waxay, tumaan ciyaaraaye

Waa xaasid kuugu taamayoo, tiimbad kuu qoodiye

Sidii kadafka talantoola bay, foolka kuu tubiye

Waxaan kugu tilmaannaynna waa, kugu tasheegaane

Tiih iyo wareer bay qabaan, togagga rooraane

Taraar bay u jeexaan birtii, wada talfiiqnayde

Wax tafiqay qalbiga waa khamrada, taxarrankeediiye

Waa wada tin doofaar haddaad, soo tawaajihiye

Toojana uma dhiijaan martiga, soo tarbiicsadaye

Tumunna uma quuraan miskiin, soo tawaawacaye

Waa niman tijaaro ugu kici, tooskii Cadameede

Tuurtiyo tubtaa feerahaa, laga tantoobaaye

Waa niman tammaaniin caddada, laga ta’kiishaaye

Tewin cudur tukubo ciirad bay, tananahayaane

Waa niman talooboo wadnaha, tooba weligoode

Tabbaas guryaha taandhada xafiis, taagiddiyo nooda

Turjubaanka iyo daararkaa, taabtan loo yahaye

Waa niman taraajada afkii, toxobbo fuushaaye

Sagaarka iyo caanaddey, togog la meeraane

Ugaadhaa takhtiga Hawd jirtay, teedinahayaane

Iyagaa tan iyo aamanuu, tolonku saarraane

*Waxaan ka qoray Xaaji Cabdiraxmaan Sayid iyo Xaaji Daahir Seed.

1. Wuxuu Soomaalida halakan ula jeedaa intii aan Daraawiishta ahayn.