Maansadaan waxay ka mid tahay maansooyinkii ugu danbeeyey ee abwaanku tiriyey inta aanu ka tagin adduunka, waana maansooyinka uu ugu jeclaa waayo waxaa uu kaga hadlayaa dhimashada iyo wixii ka danbeeyey waana gabey wacdi iyo waano ah.

Sagaashan iyo dhowr sano haddaan samo ku noolaado
Sakaraatul mood baa ku xigi subax aan dheereyne
Hadduu ruuxa iga siibo Malag amar cad loo siiyey
Oo saaqba saaq lagu duwoo mara cad lay saaro
Waxay igu samiyi magac cusuboo aan i soo marine
Sidaa yeela meydkey i oran saacad dabadeede
Sariirtaydi bay iga beddeli saxar la’da ahayde
Qabrigii i sugi jiray haddii midig la ii seexsho
Saddax xarar haddii lay dul suroo jaqafyo lay saaro
Oo ciidda igu soo rogaan ahalyo saaxiibo
Oo saabaanka leyga ceshadoo la iga sii yaaco
Oo kaligey aan soo haraan laba sugaayaaye
Ilaahayow su’aalaha qabriga aanan sixi waayin
Allow igu sug towxiidka oo Nabigi hay seejin
Siraadkiyo qiyaamana Allow haygu saran seerin.

Gabaygaan waxaa uu gabyaagu tiriyey maalmihii ugu danbeeyey ee aanu buuggaan ka shaqeyneyney daabacaddii koowaad, ka dib markii aan arkey gabyaaga beeshiisa oo ka lugjiideysa taageeridda dowladdii lagu soo dhisay Carte ee dalka Jabuuti oo uu hoggaaminayey Cabdi Qaasim Salaad Xasan.

Sayn xaarle sayr sayrisee Sacadow yeelkiinna
Soomaali waa kala tagteen sucamadoodiiye
Sagaal iyo sideed Digil iyo Mirif kala socdaasheene
Sama talis Xawaadliyo Abgaal kuuma uursama’e
Saddax iyo Sagaal Murusadana waa sidoo kala’e
Suleemaan iyo Dudublana horaad sulux ku sheegteene
Sacad Cayr ka harayow ciddaad sugi aduunbaa og!

Shirib:
Soomaalaa sowd ku dooratee sokeeye diidey sayrabaan?
Umadu waa oggol yihiin adduun kuna waa aqoonsadeen
Aqri badeena waa yihiin abaalna waa u erganaay
Itaalna waysku ag dhacnaa idinna wayla ogtihiin!

Gabaygaan waxaa la tiriyey 17kii Oktoobar 1997kii, maalintii Jimcaha oo ay isugu tageen beesha Sacad, labadooda qaybood Jaamaca Ummadda meeshii ahaan jirtay, si ay u heshiiyaan. Kulankaas waxaa uu ku dhammaaday jawi nabadeed oo ay ka muuqatay is jeceyl iyo ka shalleyti wixii la soo maray ee hore oo khilaafaad iyo dagaalba ahaa.

Taariikhda sooyaalka ahe Sacad ku naaloodo
Soddonkii fac sharafkaan sidnaad sahal u laaddeene
Sinji waxaanan u lahaynna waad nagu saxiixdeene
Sanka iskama duraan laba simane waysku siranteene
Towfiiq Allaha noo saqiro way nasidataaye
Waagii siyaasada cusubi Sacad ka waynaatay
Oo saar Hindigu nagu dhacoon samada eegaynay
Cumar Dheer kuwii sababayna aan daba saqleynaynay
Kuwaan uurka wada seexanana sulux ku sheegaynay
Waxay sababtay gacal aan hub sidan suuqa ku ogaarso
Iyo inaan Saciim wayno oo Sacad agoontoobo
Waxba gabaygu yuu ila sidbane waxaan ku seeteeyey
Sidii la arki jiray curadku waa lama saluugaane
Waxay noo saxiixaanna waa samiyo kheyraade
Sinji dhaannimana lama rabee Sacadow taageera.

Waan maanso Siinley ah oo uu gabyaagu la yaabban yahay arrimo dhowr ah ee ka dhacay geeska Afrika iyo degaanno ka mid ah dunida Islaamiga, sida xiriirka ka dhexeeya dad Somaaliyeed iyo Itoobiya, sidoo kale siyaadaha reer galbeedka ee uu Mareykanka ugu horreeyo ee la xiriirta dunida Islaamka.

Siinleyda gabay waxaan ku nacey ugana sukuuday
Hadba kooxda ay saaran tahay sax uma eegaane
Siday tahayna uma fiiriyaan nuxurka suugaanta
Anna saama leyl baan u kacay sahala maahayne
Yey ku seegin maalmaha sabtiga tixaha Siinleydu
Siddo’ la qabto gabay aan laheyn waa ka saahidaye
Rabbina ha iga saamaxo wixii sabaqu liisaana
Iyo sacabkii ley tumi jiroon samaha moodaayey
Afartaa si aad garan kartiin meydin solonsiiyey
Siddo la qabto mowyeelay iyo seedaan laya leexan
Saddax kalana waa midaan u sinay magaca Soomaali
Sinjiga Xabashi sidii lagu yiqiin waa ku socotaaye
Maxaa sababay gogol Soodariyo sibiqda dooloowa
Maxaa sababay Suugiyo Shilkaha saqiiradii laayey
Maxaa sababay saadaasha xune Xabashi loo seexday
Maxaa sababay gaal seyn lohoo siqaya ciiddeenna
Maxaa sababay kumanyaal sirdoon Sababa loo geeyey
Maxaa sababey oo lacag saqrada Sanaawi loo siiyey
Maxaa sababey Soomaali qaar Xabashi soo raacdey
Sirdoonkii Israa’iil maxaa Sababa loo geeyey?
Maxaa calanka Soomaaliyeed Xabashiguu siibay
Waa Su’aal ma doonaa la yiri sadarka muuqdaaye
Cabdi Majiid hadduu suuxayoo dhaawacmoo sirirey
Isxaaq Rabiin muxuu ugu safriyey saba Yahuudeedka
Saxwada diinta maxay uga cawdeen sanad Mareykaanku
Muxuu Kilinton saad ugu baxshaa sababo diimeedka
Maxay Suufiga u jecel yihiin selefna ceebeeyay
Suudaan maxey galabsadeen waa su’aal culuse?
Seddex gees dagaal ehey kufrigu saf ugu qaadeene
Oo hub iyo saanad u heleen kuna siqaayaane
Waxaa sababay diintii Alley sara u qaadeen dhe
Waxay Carabi sugayaan ma garan saxal Alloow keenye
Sidey ku habbooneyd iyo baldaa saamigaan rabaye
Haddey subax ka yaacaan Yuu.En-ada lama saluugeene
Sahyuuniyadda gurigeedi bay kharashka siiyaasne
Markaasaa Fiito laga saarayaa samafalkoodiiye
Seetaa Ciraaq lagu qabbirey sagaashamaadkiiye
Nimcadii Eebbehey siiyey bay qalinka saareene
Khaliijiguna sacabkuu u tumay gaalka seynta lehe
Sinji waa maguuraanoo waa suu ahaan jiraye
Sayid Maxamadoo difirayaad sahay u diideene
Siddeetan iyo lix guuradiina waa jananka Suudaane
Sal iyo baar anaa idin aqaan salafka mooyaane
Adigoon cimaamado sumadda madaxa ii saaran
Kala saar Sunnada iyo bidcada ha isku suugeyne
Waxba gabaygu yuu ila sidbane waxaan ku seeteeyey
Soddon dowladoodoo Muslimoo hub iyo saad heysta
Sanka waxay Yuhuudi uga duri sababta ii sheega
Suudaani waa Carab Muslima saan ogsoonahaye
Sunnihiyo kitaabkii Alley madaxa saarteene
Saddexda gaal waxay ugu kulmeen sababta ii sheega
Siyaasiintii Soodare tagoo Senaawi sooryeeyey
Waxay Dooloow uga saakideen sababta ii sheega!
Dad saboola oo silicsanoo sahay yar loo keenay
Dekaddiyo goroonkina sakiray Sababta ii sheega
Soomaali anigaa xukuma suluxna waa diiday
Saddexda raadiyana waa ogyahay sababta ii sheega?
Dadku wuxuu u seeteysan yahay toban siyaasiine
Culimadu waxay ula socdaan sababta yey sheega?

Gabeygaan waxaa uu Abshir Bacadle mariyey sannadkii 1984kii, waxaana uu ku weerarayaa gabaygaan dariiqooyinka siiba dariiqada Rabiiciyada, waxaana ka muuqata in abwaanku isaga oo careysan tiriyey maansada sida uu ku caddeeyey tixda gudeheeda, waayo ma aha arrin sax ah in dad Muslimiin ah lagu tilmaamo ama lagu sheego riddo iyo gaalnimo si kasta oo fikradaha leysugu khilaafo.

Kitaabaha markii laysla rogey oo run laga sheegay
Waatey riddoobeen mar qura ru’asadiiniiye
Nin waliba halkii laga rabuu raali geliyaaye
Kacaankeydin raacaye wallee iguma raagteene
Markaan dibirta kugu soo ritaa layga kaa rogaye
Waxaan caro la riimaba haddaan soo ruqaansadaye
Rixladii waxbarashadu haddey soo rogaal celisey
Ragaadkii imudey wey biskadey roobna wey da’aye
Rumaatiisamkii weyga baxay ruugagga ijaraye
Halkii raranku iga gubi jiraa rays kasoo duxaye
Rag kuu helay Rabbina kuu cuskadey Ruushna waa tegaye
Ruqruqaan sigiinaan maqliyo wey rawaxayaane
Reemaha inaan kugu wadaco waa sidaan rabaye
Raan weynayaa shiyo bidcada diinla kala reebey
Rukumada in loo siibi karo maba rumesneyne
Rajaase haatan ii muuqatiyo raaxo iyo khayre
Hadba raxan hakaa leexsadeen waa sidaan rabeye
Rugta Gaalkacyood lagu raqsiyo xarunta Ruunsheelo
Ma Rusuul qarsoon baa fadhiya meeshan lagu riimo?
Rag hadday lahaayeen horay xaqa u raaceene
Rabbi baan ku dhaartiyo Allihi Raasiqa ahaaye
Ra’su diinka weli maanay garan ru’asadoodiiye
Afartiisa rubuc baan bartay ribix u haystaane
Dhaaxaa la ruugood naflaha roob ka gadateene
Ri’ ka qaada caamadu hadday rara gubyoodeene
Kitaabaha markii laysla rogey oo run laga sheegay
Waatey riddoobeen mar qura ru’asadiiniiye
Nin waliba halkii laga rabuu raali geliyaaye
Kacaankeydin raacaye wallee iguma raagteen
Markaan dibirta kugu soo ritaa layga kaa rogaye
Waxaan caro la riimaba haddaa soo ruqaansadaye
Rixladii waxbarashadu haddey soo rogaal celisey
Ragaadkii imudey wey biskadey roobna wey da’aye
Romaatiisimkii weyga baxay ruugagga i jaraye
Halkii raranku iga gubi jiraa rays ka soo duxaye
Rag kuu helay Rabbina kuu cuskadey Ruushna waa tegaye
Ruqruqaan sigiinaan maqliyo rawaxayaane
Reemaha inaan kugu wadaco waa sidaan rabaye
Raan weynayaa shiyo bidcada diinta kala reebay
Rukumada in loo siibi karo maba rumeysneyne
Rajaase haatan ii muuqatiyo raaxo iyo khayre
Hadba raxan hakaa leexsadeen waa sidaan rabaye!

Abshir Bacadle gabayga soo socda wuxuu ku cabbirayaa sida ay fikraddiisa ugula muuqato nolol bulshadeedka Soomaali meelo ka mid ah, gaar ahaan habka loo kala leeyahay degaannada qaarkood sida deegaannada Jubbooyinka oo dhibaato badan iyo is qabqabsi ay ka dhacaan beelaha Soomaaliyeed oo halkaa wada dega. Abwaanku halkaan dereen suugaaneed ayuu ugu muujinayaa sida uu u arko xaquuqda degaanka iyo sida xaq loogu kala leeyahay:

Diiwaanka taariikhda gabay daabacaan tirini
Ninkii dudaya yeelkiiye garsoor dow ahaan ridiye
Yaa deegaan ah, yaa dool ah baan diirka ka caddeyni
Anba doolka yimid baan ihiyo duulka soo galaye
Hirka Absame haddii aanan ku helin ma ihi deegaane
Dawankii colaadoo Jubbada hoose dananaayey
Oo doolku wadi jiray haddaa daawo loo helaye
Rag isku darahoo deegaan ahoo diin leh baa tegaye
Oon duulaan ku aadine ku tegay dalabka deegaanka
Daroogada cagaaran inteey dilatay mooyaane
Shacabku waa ku diirsaday xaqii daaha laga qaaday
War-day iyo Absame waa degaan kalase deyr weyne
Doqon-diide Cowramale, Dir iyo Sheekhaasha,
Mushunguliga xeebaha degiyo webiga daaciisa,
Hartigu waa deegaan la hubo oon ciddina diideyne
Taariikhda duugga ahi waa lama daboolaane
Siddeedani deegaan weeye haba kala danbeeyeene
Digil ya Ciis deegaan ma ahan waa deris wadaagaane
Daa’iratu Seban buu waqtigu daadihinayaaye
Waa daalac naasile Baroow damaca aashaada
Nin dool ihi hadduu qolo didshoo dega makaankooda
Oo loo daayo seban wuxuu is dhihi dowlad baa tahaye
Lama dooran, mana aha deegaan duullan buu wadaye
Asba Morgan buu didayayoo loogu dowgalaye
Ina Aadan Dheeruu ku daray kama dambeysiinee
Dubuhuu la rabay Ina Cigaal dib ugu soo laabay
Hadalaabo Hiiraale kuwo diin leh baa yimide
Ninka daadka sheegoo Rabbigeey guusha ugu deeqay
Dirkii waa Absame, kuna darsaday Daahi Caalim ahe
Yaan damac ku gelin boqol kun buu daadihinayaaye
Dibedahana meer waa digii diiday nabadiiye
Ama diinta raac waa dantaa labada daarood ba!

SHIRIB
Dad waa dool dadna waa deegaan, Deris wanaagse diidi maa
Dawanka Tigri waa damaa, Dad diin lahaa dalkoow heraa
Kornayl Hiiraale waa kudee, Kitaabka Alle kukta saar
Qabiil iyo Qaad u qeyliyoow, qowlkoodu qiima yeela maa
Barre Bax Baydhabaa xigtee, Kitaabka baahay maw bogteen?

Gabaygaan gaaban waxa uu gabyaagu ugu tala galay in uu ku muujiyo taageerada uu u hayo maxkamad Islaami ah oo ka mid ahayd maxaakiimtii ay samayn jireen qabaa’ilka qaarkood gaar ahaan maxkamadda ay hormuud u ahaayeen beesha Saleebaan ee Habar-Gidir, taasoo ka jirtay magaalada Muqdisho lana sameeyey horraantii sannadkii 1998kii. Waxaan gabaygaan ka soo guuriyey wargayska Ayaamaha ee ka soo baxa magaalada Muqdisho bogga 4aad soona baxay Axad 21ka Juun 1998kii, wuxuuna ka bilowday sidatan:

Da’dii iga yareyday maxkamaddaan ku diirsadaye
Dulmi diidna waan kugu aqiin Daa’in abidkaaye
Halkaan laga dawoobayni waa damaca keygaaye
Degaan iyo dhalyaba waxaynu nahay duul allays badaye
Dulmi diidka iyo damacu waa dab iyo baasiine
Meeshay ka biyo daysay baan idin dareensiine
Dadka iskuma nebcine damaci baad diidey leedahaye
Markaasaan dacaayad iyo cay kugu daweeyaaye
Meeshay ka biyo daysay waan idin dareensiiyey
Ninkii dow kaleeto u hayaa ha ina deeqsiiyo
Oo deelaydu waa furan tahaye gabay ha soo duubo
Docda kalena duul wada dhashay hadal madaayaane
Doqonnimo Sulaymaan maxkamad looga dumin maayo
Dadkuna ways yaqaaniin tan iyo duudi nabi Aadam
Xagga deeqda kuma fiicnidiin dirirta mooyaane
Dar Ilaahay wixii loo baxshaa dib ugu aaydaaye
Maxkamaddaasiyey nooga dumin diiday shilinkayga
Diiwaanka aakhiro ku shuba dunida yeelkeede
Durba waxay ku naaxdaayi waa dagada maalkiina
Duntiinaa wanaagsane ayida diinta nuxurkeeda
Ducaan idinku taageerayaa Daa’in abidkeeye
Doc kaleey ku lumi xoolahaad diid is leedahaye
Dagaalada ahligaa wixii ku baxay tani ka doorroone
Dadweynihiyo shacabkaa amniga doonayoo raba e
Duf ku baxa wixii diiddanoow diinta Nabigeena!

Sababta gabaygaan keentay waxay ahayd markii ay heshiiyeen taageerayaasha Janaraal Caydiid iyo kuwii Korneel Cabdullaahi Yuusuf, kana heshiiyeen degaannada Mudug, laakiin heshiiskaas ma noqon miduu jecleystay hoggaankii ciidamada Mareykanka ee hor kacayey halganka Yunisoom ee Soomaaliya ka waday, isaga oo Abshir arrintaa ka hadlaya taariikhdu markay aheyd 1993dii waxaa uu yiri:

Dadweynow su’aal diiran baan idin dareensiine
Gartii adiga kuu daadagtaa lagu dawoobaaye
Dadkuna kuma qancaan been cadoon mara ku daahneyne
Hadduuyan how dan gaara iyo wadan dabin inoo qoolan
Oo diinta iyo dhaqankayaga duullan ku ahaynin
Maxuu uga dagaalamahayaa dib u heshiisiinta?
Dayaaradaha Aay.Sii maxuu noogu dabandeebshey?
Maxaa raadiyaha loo dunshaye looga damagsiiyey!
Dukun daakun maxaa looga dhigay danihii Soomaali?
Maxaase Odaga kaligii ku direy waa dareen culuse
Danbigiisa maa nala tusiyo nooma daadegine
Inuu dib u xisaabtamay un bey ula dagaaleene
Anana diidnay doofaar inaan duqa ku siideyno
Alana diidyey inay nagu digtaan ducuful iimaanku
Sayid Muxamed baa nooga digay damaca gaalaade
Daruus iyo tusaaluu na faray dabac la’aaneede
Wuxuu yiri dalkayagay rabaan duumo laysaguye
Wuxuu yiri dagaal waxaan aheyn kuma dawoobaane
Wuxuu yiri markii loo dabcaba waa ka darayaane
Wuxuu yiri damiir laawayaalkay dugsanayaane
Ninka dib u xisaabtamahayana way dur jinayaane
Waxuu yiri nimaan diin laheyn dibi ka liiteeye
Waxuu yiri dir Soomaaliyeed gaala diid noqoye
Dabka u baxaya anigaa ifiya ina Daraawiishe
Anaa daarta aakhiro raboo waan dagaalamiye
Dabra weerarkaasaan ku jiri Daa’in abidkeeye
Inta ruuxu iga daynayana diiday baan orane
Muslimka iga danbeeyana kufriga wowga digayaaye.

Gabaygaan waxaa laga tiriyey dadka aqoonyahanka ah oo kaalintooda waddanimo aan ka soo bixin, balse qabiil dhinac ka raacey:

Danta guud anoo ka hadlayoon doc isku buuseynin
Aqoonyahanka doorkooda gabay waa u digayaaye
Doqonnimo faan iyo dirsooc wayna daashadaye
Isku duubnidiyo wadajirkii dib ugu soo laabta
Oo jaahil yuu idin dirsane diida hadalkiisa
Jiilaalku goortuu durkoo doogga la idleysto
Oo ceesha lagu dowdamoo lagu dekeynaayo
Darkoo maran haddii deeqo iyo sulub la soo daayo
Dacda kama cabtee waa inay kugu dul meertaaye
Danbarkeeda kii maali jiray waw danqanayaaye
Wadaamaha markaan doojinoo dowliga u qabano
Dabcigeenu waa xarig markoo lagu dagaalaaye
Mase naqaano xeer dowladeed dirira mooyaane
Daftarka iyo qalimada kuwaan ugu dadaaleenay
Danbiilahana lagu soo korshiyo kimista duuduuban
Kuma diirsan daynkina ma gudin duuma laysaguye
Oo dib u heshiisiinta qaran uma dadaalaane!

Gabaygaani waxaa uu ka mid yahay gabayada ka hadlaaya dib u heshiisiinta Ummadda Soomaaliyeed kaddib markii ay ku habsatay musiibo iyaga ay gacmahooda ku keensadeen, waxaana uu Abshir mariyey bilowgii 1992kii.

Deeleyda maansada markey damacdo laabtaadu
Dembi inaysan kaa raacin baa lagu dadaalaaye
Diiwaanka waxad geysataad dib ugu aaydaaye
Muslim laysku diro duul horaa naar ku daakhilaye
Dibnahaaga lama baro midaan lagu dawoobeyne
Dabna laguma sii shido inaa damiso mooyaane
Ninkaanse dhiigga daadanahayaa damaqin yeelkiisa
Oon labada daarood tan hore derejo moodaaya
Gubey kaga daydeen oo dulmi bey derejo moodeene
Rabbi hibadu ugu deeqay bay dacarku beereene
Waana inagu kala dilahayaan tan iyo deeleeye
Waa loo darsadey odayga wey nagu diraayeene
Duqii lagama reysane afkaa diidayoo nacaye
Ciilkii nadaa lamase helin dux iyo iidaane
Dibse wexey ka noqon moogiyoo Daa’inkaa garane
Dad weynow su’aal diiran baan idin dareensiine
Gartii adiga kuu daadegtaa lagu dawoobaaye
Dadkuna kuma qancaan been cadoon maro ku daahneyne
Duqii hore maxaa loo eryoon kula dagaaleyney
Dalkii iyo dadkiyo diinti buu dumiyey sow maaha!
Digtatoornimuu keenay iyo dulun cad sow maaha!
Ka daroo dibi dhalbaan aragnay iyo furuqyo daacuune
Nin walbow walaalkaa dad qala how durbaan tumine
Yaan laydin dabargoyn qabiil dowlad noqon waaye
Gobtaan didiney nabad uma deganin daharo hoodiiye
Daliil kalana waa dood yaroon idin dareensiiyey
Dadku inuyan kala maarmi karin dib u xasuusnaada
Qolona qolo ma dabargoyn kadhee weysku daganteene
Inaan dagaalkii wiil noogu dhalan dib u xasuusnaada!
Dabley dooxataa iyo Qabiil laysku dabar gooyo
Daryeel li’ida maatida dayacan lana duqeynaayo
Denbi nimaan leheynoo sidii deero lagu tuujo
Ayax bililiqoo nagu degoo diirtay beledkeena
Dagaalaan dhammaan waxaa ka roon dowlad jaa’irahe
Duqii doona ducana ugu dara waadna dilateene
Ama dowladnimo muujiyoo qurunka daaweeya
Kala doorta labadaasi waa kama danbeystiiye
Dal shisheeye duulkii mutaa dowlad wuu tabiye
Duruufihii na soo marey qalbiga waa damqinayaane
Allow yaa inoo diga markaan duqa ku yaaceyney
Allow yaa inoo diga markaan deriska riixeyney
Allow yaa inoo diga markaan ugu darraaneyney
Allow yaa inoo diga markaan dacarta beereyney
Allow yaa dersiga naga khaldamey diirad ku iftiinsha
Allow yaa dabaadiga hariyo degelka noo ceynsha
Allow yaa dabkoo idil ku rida dowlad gacanteeda
Allow yaa ninkii madax dalbada duco u raacsiiya
Allow yaa dagaalada ahliga dib uga waantooba
Allow yaa dadkii wada dhashoo laysku dacareeyey
Allow yaan mar kale daawadaa deris wanaagooda
Allow yaa dalkoo nabadgalyaa diinta ku hoggaansha
Allow yaa dersiga muqadaska ah dib ugu soo laabta
Allow yaa difaaciyo amniga dhidibadu u duuga
Allow yaa daroogiyo qabiil inaga daaweeya
Allow yaa dakanadiyo fidnada deli ka tuuryeeya
Allow yaa duruufahan ad-adag deben ka sheekeeya
Allow yaa dariis ciidan iyo dowlad mar u jeeda
Dib wax ugama sheegeen askari daa’in abidkeeye
Mana dicaayadeeyeen mas’uul qaranku doorteene
Afartaa qabiil nimuu dishoo dudaya how sheegin
Danta guud nimaan eeginoo doqona how sheegin
Dalka nimaan u dhalan kuma duxdee duulow ha u sheegin
Dad-qal dib u heshiisiinta neceb dulucda haw sheegin
Nimaan diin laheyn iyo dabley dirirsan how sheegin
Murti nimaan da’deed gaariniyo ducufo how sheegin
Afar jeeble dayn hore cunoo dabacsan how sheegin
Digtatoor dan gooniya watoo durugsan how sheegin
Nimaan dhiigga daadanahayaa damaqin how sheegin
Danbarkeeda nimaan maali jirin dowlad ha u sheegin
Dufna ku baxa wixii diidanow dib u heshiisiinta!